Assi: GIF

Qulaarpaa Niviarsiaqqat aalanikippallaartut

Niviarsiaqqat inuusuttunngulernerminni timersorneq unitsittarpaat ikippallaallu timertik aalatittarlugu.

Namminersorlutik Oqartussat innuttaasut peqqissuunissaannik 2014-imi misissuineranni tamanna erserpoq, aamma Kalaallit Nunaanni Timersoqatigiiiffiit Kattuffiata misissuinerisa kingulliit inerneri taama takussutissaqarput. 

- Malugisarparput niviarsiaqqat 14-inik ukiullit timersorunnaartartut. Tamanna ilungersunartutut isigisariaqarparput, Carsten Olsen, Kalaallit Nunaanni Timersoqatigiiffiit Kattuffianni qullersaq oqarpoq.

Aamma atuaruk Genip immikkuullarissup kalaallit sukkulersittarpai

Kalaallit Nunaanni Timersoqatigiiffiit Kattuffiata malugisarpaa arnat niviarsiaqqallu angutinit nukappiaqqaniillu aalannginnerusartut. Pissutsit taamatut atuupput timersoqatigiiffinni ulluinnarnilu samisassaqartitsivinni. 

Taamaasillutik arnat angutinit oqimaappallaarnerukkajulersarput peqqinnissamullu siunnersuutigineqartut malinneq ajorlugit.   

Paasisat nutaat maanna suliap nanginneqarnissaanut atorneqassapput. Kalaallit Nunaannimi Timersoqatigiiffiit Kattuffiata timersornerup tamanut atuutsinnissaa sulissutigaa. 

- Niviarsiaqqalli timersortittarnissaat ajornartorsiutaasoq takusinnaavarput, tassinilu iliuuseqartariaqarpugut.

Aamma atuaruk Eqiasuppallaarpugut, pualavallaarlutalu​

Namminersorlutik Oqartussat innuttaasut peqqissusaannik misissuineranni erserpoq niviarsiaqqat 15-17-inik ukiullit 8 procentii kisimi piffissaq timersornermut ullormut atorneqartussatut innersuussutigineqartut malittarpaat.

Kalaallit Nunaanni Timersoqatigiiffiit Kattuffiata taamaammat piffissami aggersumi niviarsiaqqat suut timersornermi amigaatigisarneraat misissorniarpaa. 

Niviarsiaqqat timersorneq aqqutigalugu inuttut ineriartorsinnaanissartik takusinnaassagaat, Kalaallit Nunaanni Timersoqatigiiffiit Kattuffiata suleqataaffiginiarpaa angorusullugu, Carsten Olsen neriuppoq.

- Timersornermimi nuanneqisumik ataqatigiittoqartarpoq. Timersornerup iluani nuannaartoqartarpoq inuttullu ineriartortoqartarluni. Niviarsiaqqat amerlanerusut timersornermik aallussaqarlutillu attassisut ukiualuit tulliuttut ingerlaneranni amerlisimanissaat neriuutigalutigu, Carsten Olsen, Kalaallit Nunaanni Timersoqatigiiffiit Kattuffiata qullersaa oqarpoq.

Aamma atuaruk Mamakujuttut Teresap toqqissisimanarisimavai

Ataatsimut isigalugu meeqqat inersimasuniit aalanerukkajunnerusarput, inersimasullu qaffasinnermik ilinniarsimasut timersornermik soqutigisallit amerlanerusarlutik.

Danmarkimi timersorneq pillugu misissuisarfimmit, Idrættens Analyseinstituttimit, kisitsisit.​

Isummersuutit


 

Pages