Niviarsiaqqap toqunera misissuiffigineqalerpoq
- Taassuma toquneranut pissutaasut tamakkiisumik qulaajarneqarnissaat uannut pingaartorujussuuvoq. Suliamik ilisimasalinnit naliliisoqartariaqarpoq. Tamanna ingerlanneqalereerpoq, naammassinissaalu utaqqiinnartariaqarparput. Peqqinnissaqarfimmi sulisut allanngortinneqarnissaat pisariaqartinneqarnersoq pillugu Nunatsinni nakorsaaneq naapikkusuppara, Agathe Fontain oqarpoq.
Niviarsiaqqap qulinik ukiullip napparsimanermini atugassarisimasai Narsami innuttaasut naammaginagit innuttaasut 50-it missaat akerliussutsimik ippassaq takutitsipput. Niviarsiaraq naamigut anniarmat angajoqqaavi napparsimmavimmut siorna novembarimi saaffiginnipput. Nakorsamit ikiorneqarnani arlaleriarluni angerlartinneqarpoq, qipinngulullunilu januaarip ulluisa aqqaneq-aappaanni toqukkut tassa qimaguppoq.
Inuilli napparsimmaveqarfimmut Agathe Fontainip tatiginneqquvai.
- Paasisinnaalluarpara taamatut pisoqarnerani tamat akuuffigisaannik katersuunnissaq, misigissutsillu ersersinnissaat pisariaqartinneqarsinnaammat, kissaatigaaralu taamatut alianaqisumik pisoqarnerani aliasunnerput misiginneqataanerpullu ersersinniarlugit naapissinnaasugut, aammali peqqinnissaqarfimmi pisinnaasartik periarfissallu naapertorlugit sulimmata tatigalugit, Agathe Fontain oqarpoq, ilanngullugu oqarluni Narsami Napparsimmavimmi sulisut nammineq tatigigini.
