Vivi Sørensen Niviarsiaqqap sinnattua piviusunngortoq
Ullut tulliuttut Vivi Sørensenimut ulapaarfiussapput, tassami unnuit pingasut tulleriit Københavnimi Skuespilhusimi, Det Kongelige Teaterimut atasumi, isiginnaartitsisaqataassapput.
Vivi Sørensenip ukiuni sisamani Skuespillerskolen ved Odense Teaterimi isiginnaartitsisartunngorniarnini ataatsimut isigalugu nuannersutut artornartutullu eqqaavaa.
Maannalu tassa meeraallunili sinnattua piviusunngulerpoq, tassami isiginnaartitsisartutut allagartani arfininngorpat tigusussanngorpaa, aperaarpullu killiffini qanoq nuannaritigineraa.
- Nuan. Eqqissisimasumik nuannaarpunga, soorlu imatut nilliarusunnanga; NUAAN! Kisianni soorlu; Kaar, tassa piffissanngorpoq aamma atuarfik qatsunnarsivoq. Naammaleqaaq, Vivi Sørensen illalaarluni oqarpoq.
Qallunaat nunaanni inooriaaseq sungiusimanngisaq danskillu oqaasii ulluinnarni atugarinngisat isiginnaartitsisartunngorniarnermi ulluinnarsiutigissallugit imaannaasimanngillat, angerlarsernerlu initusarsimavoq.
Maannali tassa sukataarneq imminut akilerpoq.
- Tupigusoqaanga. Ukiut sisamat tassa ingerlareerput, Vivi oqarpoq.
Vivi Sørensen isiginnaartitsisartunngorniaqatinilu isiginnaagassiaq quiasaarusiaq Tartuffe Skuespilhusimi, isiginnaartitsisartut akornanni nuannaartorineqaqisumi, marlunngornermit sisamanngorneq ilanngullugu isiginnaartitsissutigissavaat.
- Qujamasunnartorujussuuvoq. Pissutigalugu; ammaassisinnaagami. Inuit isiginnaartitsinerup silarsuaani suliaallik takusarsinnaavaatigut, isiginnaartitsisartunngorlaaq oqarpoq.
Vivi ilinniaqqissaaq
Vivi Sørensenip ilinniariarluni aallannginnermini isiginnaagassiat soorlu Supro Show aamma Sofa Aappalaartoq suleqataaffiginikuuai. Aamma aallakaatitassiat Tillerneq kiisalu Labrador Kangian´-ni nuannarineqarluartut oqallinnernillu pilersitsisartut suleqataaffiginikuuai.
Vivi Sørensenip suliaanik malinnaasut nutaaliornissaanillu qilanaartut utaqqilaartariaqassapput. Tassami Vivi Ottawami Canadamiittumi isiginnaagassianik ilitsersuisartutut ilinniaqqaassaaq.
Vivi Sørensen isumaqarpoq kalaallit namminneq, tikisitanik ilitsersuisoqaratik, isiginnaagassiornerulernissaat pisariaqartoq.
- Taava Nunatsinnut uterumaarama nukittullunga isiginnaagassiorsinnaanngorsimallungalu, uagut oqaluttuagut nammineq qaluttuarisalertariaqaratsigit, Vivi oqarpoq.
Canadamulli nuukkallartinnani Nunatsinnut angerlalaassaaq.
- Marlunngorpat tulliani Nuummukalerama qilanaaqaanga. Angerlalaarnissara qilanaarersuaarpara.
AAMMA ATUARUK Inatsisitigut ataataqanngitsut pillugit isiginnaartitsisoqartoq
