Niviaq Korneliussen Naalagaaffiup eqqumiitsuliornermut aningaasaateqarfianit akissarsitinneqartoq
Atuakkiortoq inuusuttoq taamaalilluni aningaasaateqarfimmit 75.000 koruuninik akissarsitinneqarpoq.
- "HOMO sapienne" arlalitsigut allaanerussuteqarpoq, peqatigisaanillu ilisarnartunik sammisaqarfiulluni: inuusuttuneq, kinguaassiuutit atornerat, piorsarsimassuseq kinaassuserlu. Pingaarnertullu suiaaqatiminoortuuneq pineqarpoq.
- Qulequtaannaaluunniit oqaasilerinikkut torrallataavoq. Atuagaq inuusuttuuneq pillugu inersimasunut atuakkiaavoq; ilinniartuunermut tunngavoq, ilisimatusarfimmi pisimasuutinneqarluni, aamma illoqarfimmi inuunermik oqaluttuartuuvoq, naallu kalaaliussuseq kapitalimi ataasiinnarmi sammineqaraluartoq naalagaaffeqatigiinni kalaallit atuagassiornikkut ilisimaneqalernerannik naqissusiivoq, Naalagaaffiup Eqqumiitsuliornermut Aningaasaateqarfia tunngavilersuutaani ilaatigut taama allassimavoq.
Aamma atuaruk Atuakkiaq "Homo Sapienne" nunatsinni Danmarkimilu soqutigineqarluartoq
Atuagassiortut tallimat aningaasaateqarfimmit akissarsitinneqarput, sinneri tassaallutik nipilersoqatigiit Malk de Koijn, naalagaatsuuniarlutik hip hoppimik taalliatik pillugit, Jakob Martin Strid, Niels Lyngsø kiisalu Madame Nielsen.
Atuakkiortut nunani avannarlermiut unammissavai
Niviaq Korneliussenip atuakkiaqqaataa aviisip Politikenip atuakkiortumut nersornaasiuttagaanut aamma piukkunneqarluni innersuunneqarsimavoq, pissarsiarinaguli. Aammattaaq Nunat Avannarliit Siunnersuisoqatigiivisa Atuakkiortumut nersornaasiuttagaannut innersuunneqarpoq. Atuakkiortut 14-it innersuunneqarsimapput, nersornaallu ataqqinaatilik 350.000 koruuninik aningaasartaqartoq Reykjavikimi oktobarip 27-ani tunninneqartussaavoq.
Atuakkiortoq tarnip pissusaanik ilisimasalittut ilinniagaqartoq naapikkusukku Danmarkimilu Odensep ungasinngisaani najugaqaruit, ullumi pingasunngornermi periarfissaqarputit. Atuakkiortoq savalimmiormiu Toroddur Poulsen peqatigalugu Odense Lyrikfestivalimut peqataassaaq, Nordatlantisk Husimilu suliaminnik atuaassapput najuuttullu oqalliseqatigalugit. Aaqqissuussineq nal. 19.30 aallartissaaq.