Niviaq ajugaassangatinneqarpoq

Qangatoorluni ujakkaarnissamut, sapaatip akunnerani tulliuttumi unammissutigineqartussamut, ullumi anngunniuttoqassaaq. Arnat 5 kilometerimut angutillu 10 kilometerimut ujakkaassapput.

Arnani anngunniuttussani 16-iusuni, Niviaq Chemnitz Berthelsen ajugaasussatut eqqoriarneqarpoq.

Ullumi unamminermi angusarissaarnertut inissittut qulit, ajugaaniutivinnissamut ingerlaqqissapput. Taamaalilluni Niviaq sapaatip akunnerani tullermi 5 kilometerimut pissartanngorniunnissamut anngunnissaminut periarfissarissaarpoq.

22-nik ukiulik Niviaq siullermeerluni VM-qataavoq. Taanna Sverigimi World Cupimi siorna novembarimi peqataaqqaarpoq, tamatumalu kingorna ilaatigut Estlandimi U-23 VM-ertoqarmat peqataalluni. Niviaq ujakkaarnermi, nunarsuatsinni sakkortunerpaami, Arctic Circle Race-imi, Sisimiuni arnani siorna ajugaavoq.

Niviaq ujakkaarnermi arnani Nunatsinnit VM-imi peqataasartut sisamassaattut peqataasoq, nittartakkami skiportal.dk-mi taaneqarpoq.

Uiloq Slettemark 80-ikkunni 90-ikkunnilu peqataavoq, aamma marlulissat Pipaluk aamma Sandra Rosing 90-ikkunni peqataallutik.

Maannali tassa Niviaq qangatoorluni ujakkaarnermi unammeqataanermi saniatigut naatsumut unammeqataassaaq.

Nunarsuarmi pissartanngorniunnerit Oslomi Holmenkollenimi pipput.