Niviaq aamma Martin ACR-imi ajugaapput
Angutini ajugaavoq OL-imi unammeqataasoq Martin Møller. Taassuma ulluni pingasuni sisoraatinik oqilaniunnermi akunnerit qulit minutsillu 36it atorpai.
Arctic Cirle Race-mi oqilaniunnermi sisorarfimmi isorartunermi normu 2nngorpoq Sloviiniiamioq Klemen Bauer taassuma ulluni pingasuni sisoraatinik oqilaniummermi akunnerit aqqanillit atorpai.
Normu 3nngorpoq nunatsinneersoq Frederik Petersen taassuma oqilaniunnermi akunnerit aqqanillit minutsillu 53it atorpai.
Arnani ajugaavoq nunatsinneersoq Niviaq Chemnitz Berthelsen - Niviap ulluni pingasuni sisoraatinik oqilaniunnermi akunnerit aqqaneq marluk minutsillu 14it atorpai.
Arnani normu 2nngorpoq Slovakiiamioq Anastasiya Kuzmina taassuma akunnerit aqqaneq marluk minutsillu 40it atorpai.
Sisoraatinik oqilaniunnermi Arcic Cirle Race-mi aaqqissuisut radioaviisimit oqaloqatigineqarnerini normu 3inngortoq suli apuussimanngilaq.
Arctic Circle Racemi oqilaniunnerit immikkortuata kingulliup aallartinnissaa sioqqullugu Arctic Circle Race-mi sølvinnattoq Anastasiya Kuzmina aaqqissuisunut oqarpoq - ajugaanissani naatsorsuutiginagu. Ajugaasumut tullinngornissara ilungersuutiginiarpara - ajugaasunullu ilaallunga - Kuzmina oqarpoq.
Tysklandimeersoq Klaus Jeckel - Arctic Circle Raceqartarnerni 14nissaa peqataavoq. Taanna Arctic Circle Race-p Facebookikkut nittartagaatigut oqarpoq - ACRimut peqataaqqilluni nuannersuusoq.
- Ulloq siulleq ilungersunarpoq - isumagippallaanngilanga - ippassarli ACR-imut peqataanera tupigutsaatigaara nuannerpallaaqqimmat.
Klaus Jeckel oqilaniunnerup ulluani kingullermi aallarnissani sioqqulugu qilanaarpoq - aamma unammiartoqqinnissanilu qilanaaralugu. Aappagu ilimananngilaq kisianni qularnanngitsumi 2016-imi - Klaus Jeckel sisoraatinik oqilaniunnerup Arctic Cirle Race-p immikkoortua kingulleq sioqqullugu taama oqarpoq.
Arctic Circle Race-mi suleqataasut oqaluttuarput - sisoraatinik oqilaniunnermi peqataasut apuuffissaminnut apuunnerisa kinguninngua tusagassiorfinnit nunanit tamalaaneersunit apersorneqartut. Taakkununnga ilaavoq Ungarnimioq OL-eqarnerani unammeqataasoq - taassuma sisorartartoqatini kaammattorniarpai Arctic Circle Race-mut peqataanissaannut.
