Nivi Olsenip 25 procentit ajuusaarutigai
- Ajuusaarutigisorujussuuara ilinniartitsisut 25 procentiinnai peqataasimammata, ingammik eqqarsaatigigaanni qanoq una periarfissatsialaatiginersoq iliuuseqarnissatsinnut meeqqatta siunissaanut, Ilinniartitaanermut Naalakkersuisoq Nivi Olsen KNR-imut oqarpoq.
Nalilersuinissamut ilinniartitsisut kissaatigineqartutut amerlanerusut akissuteqarsimanngikkaluartut Nivi Olsenip naatsorsuutigaaa meeqqat atuarfiisa siunissami qanoq ittuunissaannikoqallinnermut tunngavigineqarluarsinnaasut.
- Aamma oqarusuppunga, uani inernerisami takutinneqartumi immaqaluunniit rapportip siunertaa isumaqassanngilagut 25 procentiinnai akisimammata atorsinnaanngitsoq. Atorsinnaasorpassuarnik tikkuagaqarpoq isumaqatigiissutigisassatsinnik, IMAKilu kommunillu uagullu. Tassani ataatsimoorluta atorsinnaasagut atussuagut, Nivi Olsen KNR-imut oqarpoq.
Ilinniartitsisut akissuteqartut taama ikitsiginerannut ilinniartitsisut atukkaminnik naammagisimaarinninnerannik tikkuusinersoq nalunaarusiaq upernaaru pisortatigoortumik saqqummiuneqarpat paasinarsissaaq.
Meeqqat atuarfiini atuartut angusaat inuussutissarsiornikkut ilinnialeqqinnissamut naammaginanngitsut ilinniartitaanermut Naalakkersuisup Nivi Olsenip ilisimavaa.
- Kisianni uanga nalunngilara, aamma miserratigisinnaanngilarput, inernerit meeqqatta inissisimanerat folkeskolemit ingerlaqqittartut karakterillu assigiinngitsut takutippaat naammaginanngitsoq. Naammagisimaarneqaraluarpat ilinniartitsisunninngaanniit taanna uuttuutaasussaanngilaq, aajuku uuttuutit meeqqagut. Taakkua sallusinnaanngillat meeqqatta inernerit angusaat, taamaattumik ajornartorsiuteqarpugut, Ilinniartitaanermut, Kulturimut, Ilisimatusarnermut Ilageeqarnermullu Naalakkersuisoq Nivi Olsen KNR-imut oqarpoq.