Ukiakkut ataatsimiinneq mamianartunut tunnganani politikkimut tunngasariaqaraluartoq, Suleqatigiissitsisunit, Tillie Martinussen isumaqarpoq. Assi: KNR / Malik Brøns

Nivi Olsen: Ukiakkut ataatsimiinnissamut nukissanik katersinikuuvunga

Inatsisartut ukiakkut ataatsimiinnerat ullumi aallartippoq. KNR-ip politikerit qilanaartut ileqqoq malillugu naalagiariartortut naapippai.

Inatsisartut siulittaasuata, Vivian Motzfeldtip ukiakkut ataatsimiinneq ullaap-tungaa nalunaaqutaq aqqanermut sianeq sianertillugu ammarpaa.

Upernaaq ataatsimiinneq corona pissutigalugu sivikitsuararsuuvoq, KNR-illu politikerit  31-t Nuummi Annaassisitta Oqaluffiani naalagiannginneranni Hans Egedep Illuata eqqaani ullaarnganiit naapitai neriuuteqarluarput.

Inatsisartut siulittaasuattut qinerneqaqqittoq, Vivian Motzfeldt Siumumeersoq Naalakkersuisullu siulittaasuat, Kim Kielsen ingerlaaqatigiinnermi siuttuupput.

AAMMA ATUARUK Forsker om efterårssamlingen: Finanslov, isbjørne og Nuugatsiaq skal du holde øje med

Ulloq Vivianimut immikkut ittuuvoq.

Ukiakkut ataatsimiinneq 2020 

 

Inatsisartuni ukiakkut ataatsimiinneq septembarip ulluisa 25-anni nalunaaqutaq 11.00 aallartissaaq, novembarillu ulluisa 25-ata tungaanut ingerlassalluni.

 

Tamatuma kingorna Inatsisartut unikkallassapput, ukiukkullu ataatsimiinnermi 2021-mi februaarip ulluisa 16-iannit marsip ulluisa aappaanut ataatsimiinnermi ataatsiinnerat ingerlaqqissalluni.

 

Ukiakkut ataatsimiinnermi siunnersuuterpassuit oqallisigineqartussaapput.

 

Inatsisartunit immikkoortut nutaat 56-it Naalakkersuisuniillu immikkoortut nutaat 32-t oqallisigineqassapput.

- Inatsisartut ukiuata aallartinnera nuannertuaannarpoq, ataqqinartuuvoq aamma nuannersumik nalliussineqartarpoq. Isumaqarpunga taanna ileqqoq taanna kusanartuusoq, demokrati taamaalillugu ersarissumik takutinneqartarmat, Vivian Motzfeldt KNR-imut oqarpoq.

Vivian Motzfeldt politikkimi ukiuni arlaqalersuni suliaqaraluarluni Inatsisartut ukiakkut ataatsimiinnissaat qilanaariuartarpaa.

- Ulloq una qilanaariuaannarpara, Inatsisartut siulittaasuat oqarpoq.

Inatsisartut nukissanik katersisimasut

Nivi Olsenip aamma qilanaaraa. Taanna Demokraatini siulittaasuugallarnikuuvoq, upernaarli Demokraatit Siumut peqatigalugu naalakkersuisooqataalernerani Jens Frederik Nielsenimit taarserneqarluni.

- Soorunalimi tamatta nukissanik katersisarpugut, taamaattarpasippugut. Inatsisartuni ataatsimiittarneq sakkortusarami. Ingammik una ukiaanerani ataatsimiinneq, sakkortunissaa naatsorsuutiginikuuara, taamaammat nukissanik katersinikuuvunga, Nivi Olsen oqarpoq.

Qanoq?

- Soorlu aporaannerit sakkortuut pilertaramik taava nukittorsagassaqartarpugut. Uanga maluginiakkannik inuiaqatigiit piffissamik kingullermik sakkortutsikkiartoramik. Taava aporaassimagaangatta uagut inatsisartut iluanni silaannaq aaqqereeraluaripput inuiaqatigiinni qisuariarnerit sakkortoorujussuusarmata, Nivi Olsen oqarpoq.

AAMMA ATUARUK Ukiakkut ataatsimiinneq isumaqatigiinngiffiulluni aallartissasoq: Naalakkersuisut marluk navianartorsiortut

Inuit Ataqatigiit ilaasortaata, Mikivsuk Thomassenip suleqatimi takoqqinnissaat qilanaaraa.

- Takorniuulluni nuannersorujussuuvoq, taanna naalagiarnerup kingorna oqarpoq.

Suleqatigiissitsisut siulittaasuata, Tillie Martinussenip ulloq aamma pingaartuutippaa. Taassumali ulloq aamma pisorpassuarnik malunnaateqarfiunissaa aamma uggoraa.

- Siunnersuutit oqaluuserinissaat qilanaariuaannarpara, kisianni pisorpassuit ataatsimiinnissatsinni malunnaataasorujussuusussat, soorlu attuumassuteqarpallaarsinnaaneq ilaasortallu pasisaajunnaarsarnissaat pillugit isummerfigisariaqartariaqarnerput uggoraara, Tillie Martinussen Kukkunersiuinermut ataatsimiititaliap Kim Kielsenimut sakkortuumik uparuaaneranut tunngatillugu oqarpoq

Suliami Kim Kielsenip nipisattassiissutinut tunngatillugu qaffaaqataanermi saniatigut umiatsiaminik aalisartumut atukkiussisimanermini attuumassuteqarpallaarsimanersoq pineqarpoq.

- Innuttaasut matumami pineqartariaqaraluarput, mamianartuunngitsullu.

Naalakkersuisut siulittaasuat, Kim Kielsen ammaanermi oqalugiarpoq, tamannalu Inatsisartut ataasinngornermi oqallisigissavaat.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat