Nivi Olsen: Sorlammut aningaasaliissutit ikilisinneqanngillat
Ilinniartitaanermut naalakkersuisoq Nivi Olsen Partii Naleqqameersumut Anthon Frederiksenimut akissuteqarluni taama allappoq.
Anthon Frederiksenip Sorlammut tapiissutit ikilisinneqarsimanasoralugit apeqquteqaatimini erseqqissarpaa.
AAMMA ATUARUK Nivi Olsen: Sorlaap oqartussanit tapiiffigineqartarnera pisarnertut ingerlaannassaaq
Piviusorli tassaavoq Sorlammut tapiissutaasartut allanngunngimmata. Taamaattoq Tipsernermit Lottornermillu aningaasaliissutinit pulje B-mik aqutsineq naalakkersuisoqarfimmit isumagineqalersimavoq. Tamannalu tunngavigalugu Sorlaap puljemik pineqartumik aqutsinerminut aningaasat pissarsiarisartakkani annaasimavai.
Nivi Olsenip aamma erseqqissaatigaa Sorlaap pisinnaatitaanani aningaasanik atuisimanera pissutigalugu suliassaq utertinneqarsimammat, Sorlaallu pisinnaatitaanani iliorsimanera politiinut nalunaarutigineqarsimasoq.
Ingerlatsinermi amigartoorutit matussuserniarlugit Tipsernermit Lottornermillu aningaasaliissutinit pulje B-mit aningaasanik atornerluisoqarsimanera aammalu suliniutinut akuerineqarsimanngitsunut aningaasanik tunniussisoqarsimanera pissutigalugu naalakkersuisoqarfiup Sorlak politiinut nalunaarutigisimavaa.
AAMMA ATUARUK Aningaasanut inatsimmi aningaasaliissutit Sorlaap pakatsissutigigai
- Tassa Sorlak peqatigiiffittut ingerlatsinermut tapiissutinik ikilisaaffigineqarsimanngilaq. Imaapporli Sorlak peqatigiiffiup naammassisinnaanngisaanik allaffissornikkut suliassanik arsaarneqartoq, Nivi Olsen akissuteqaatimini taama allappoq.
Aningaasat suliassat suliarinissaannut tunniunneqarsimagaluartut immikkoortortaqarfimmut maannakkut suliassanik suliaqartumut nuunneqarsimasut aamma erseqqissaatigaa.
