Nivi Olsen: Pisortat eqqumiitsuliaatitik tuniniarsinnaassavaat

- Eqqumiitsuliortuutigut pikkoriffeqarluinnartut maani nunami 56.000-iinnarnik inoqartumi pigisavut, eqqumiitsuliorneq inuuniutigissallugu ajornartorujussuuvoq, inuinnarnut kisimi tuniniaasinnaatitaaneq eqqartorneqartillugu, Nivi Olsen oqarpoq.

Eqqumiitsuliornermik ingerlatsineq siuarsarniarlugu malittarisassanik tunngavissanillu aalajaatsunik pilersitsisoqassasoq, taamaasiornikkullu eqqumiitsuliortut piginnaasaasa eqqumiitsuliallu pitsaassusaasa ineriartortinnissaat, inatsisissatut siunnersuutip siunertaraa.

Piviusunngortinneqarnissaannullu eqqumiitsuliat pillugit peqatigiiffimmik, ilisimasaqarluartunik ilaasortaqartumik aamma arlaannaannullu attuumassuseqanngitsumik, pilersitsisoqassaaq.

Eqqumiitsuliortullu atugarissaarnerulerpata, pisortallu eqqumiitsuliaateqarnissaminnut periarfissaqarnerulerpata, eqqumiitsuliat pisortat illuutaanni sumi tamani takuneqarsinnaanerulissasut, Nivi Olsen nassuiaavoq.

- Soorlu atuarfinni, allaffeqarfissuarni, meeqqerivinni immaqa kommunini assigisaannilu eqqumiitsoqarnerulernissaa siunertaavoq, Nivi Olsen oqarpoq.

Aamma pisortat eqqumiitsuliaatitik siornatigut pisiatik tuniniarsinnaanngussavaat.

Taamaaliornikkut eqqumiitsuliat akisuut pisortat illuutaanni takuneqassanatik uninngaannassanngillat, pisortallu eqqumiitsulianik nutaanik pisinissaat kajuminnarnerulerluni.

Eqqumiitsulialli tuniniarneqarnissaannik eqqarsaateqarnermi, aningaasarsiornissaq siunertaanngitsoq, eqqumiitsuiliortulli atugarissaarnerulernissaat anguniagaasoq, Nivi Olsen nassuiaavoq.

- Inuiaqatigiinnut taakku sunniuteqassapput, taavalu aamma imminerminni eqqumiitsuliortunut nalitoorujussuanngorsinnaavoq, annerusumillu inuuniutigineqarsinnaalerluni. Taavalu eqqumiitsuliortuuneq imminut akilersinnaanngornerutilerniarlugu taanna periarfissipparput, Nivi Olsen oqarpoq.

Inatsisissatut siunnersuutip Inatsisartut ukiami ataatsimiilerpata akuerineqarnissaa ilimagineqarpoq, januarillu aallaqqaataani atuutilissangatinneqarluni.

Eqqumiitsuliornermik ingerlatsineq pillugu inatsisitut siunnersuutip saniatigut, Naalakkersuisut kulturimut inatsimmik, timersorneq pillugu inatsimmik sulissuteqarput.

Taakku aamma ukiakkut ataatsimiinnermi akuerineqassasut ilimagineqarput.