- Siullertut marlunnik meeraqarpunga, anaanatullu kisimiittuulluni 100 procentimik piareersimanissaq pingaaruteqarpoq, Nivi Olsen oqarpoq.Assi: KNR

Nivi Olsen naalakkersuisooqatigiit nutaat pillugit: Passussiffimmiinnissara qinerpara

Demokraatit pingasut naalakkersuisuniilerput – partiilli siulittaasorigallagallaa naalakkersuisunngussanngilaq.

Demokraatinit pingasut naalakkersuisunut isernissaminnut piareerput. Tamanna partiip Siumumut Nunatta Qitornaanullu naalakkersuisooqataalerneratigut pivoq.

Demokraatilli siulittaasorigallagaat, Nivi Olsen naalakkersuisunngortuni ilaassanngilaq. Taassuma allat ukkatariniarlugit oqaatigaa.

Naalakkersuisuni Demokraatit

* Anna Wangenheim, peqqissutsimut naalakkersuisuussaaq. 

* Steen Lynge nunanut allanut tunngasunut nukissiuuteqarnermullu naalakkersuisuussaaq.

* Jens Frederik Nielsen inuussutissarsiornermut aatsitassarsiornermullu naalakkersuisuussaaq.

Tusarfik: KNR

- Naalakkersuisunngorniarnannga aalajangerpunga, pissutigalugu allarpassuarnik ukkatarisassaqarama.

- Siullertut marlunnik meeraqarpunga, anaanatullu kisimiittuulluni 100 procentimik piareersimanissaq pingaaruteqarpoq, Nivi Olsen oqarpoq. 

AAMMA ATUARUK Kielsenip naalakkersuisooqatigiivi nutaat: Demokraatit naalakkersuisooqataalersut

Demokraatini ilaasortat pingasut Kim Kielsenip naalakkersuisuinut ilanngunnissamut piareersimasut tassaapput Anna Wangenheim taassuma peqqinnissamut susassaqarfik naalakkersuisuuffigissavaa, Steen Lyngelu nunanut allanut tunnganut nukissiuuteqarnermullu naalakkersuisuussaaq.

Kiisalu partiip allattaa inuusuttoq, Jens Frederik Nielsen inuussutissarsiornermut aatsitassarsiornermullu naalakkersuisuussalluni.

Atuuffiit taakku annertusut, Nivi Olsenip erseqqissaatigaa.

- Naak suliassat annertugaluartut taakku suliassamut kivitsinissamut eqqortuupput. Naalakkersuisunngortussat immikkut tamarmik nukittupput. Suliassamillu kivitsisinnaanissaat 100 procentimik upperaara, Nivi Olsen oqarpoq.

Taanna nammineerluni naalakkersuisuunianngilaq. Taassuma passussiffimmiinnissani qinerlugu oqaatigaa.

- Isumaqarpunga inuit pikkorissorujussuit akisussaaffimmik tigusitillugit. Taamaammat passussiffiinnissara qinerpara, imaanngilarli suliassamik annertuumik kivitsisinnaanngitsunga, Nivi Olsen oqarpoq.

Naalakkersuisut arfineq-marluk maanna atuuttut atuuffimminniiginnassapput, akisussaaffiilli assigiinngitsut allaanerusumik agguaanneqarput.

Naalakkersuisut ima inissisimalerput:

  • Kim Kielsen (S) siulittaasup Naalakkersuisoqarfiani ingerlaannassaaq.
  • Vittus Qujaukitsoq (NQ) aningaasaqarnermut naalakkersuisuuginnassaaq. Taassuma ullumikkumut aatsitassaqarnermut aamma akisussaaffigigaluarpaa – aatsitassanulli naalakkersuisoqarfik uunga ingerlaqqissaaq 
  • Jens Frederik Nielsen, taanna inuussutissarsiornermut aatsitassaqarnermullu naalakkersuisunngussaaq. 
  • Karl Frederik Danielsen (S) ineqarnermut attaveqaqatigiinnermullu naalakkersuisuuginnassaaq.
  • Ane Lone Bagger (S) ilinniartitaanermut, kultureqarnermut ilageeqarnermullu naalakkersuisuuginnassaaq. Taassuma nunanut allanut tunngasunut naalakkersuisoqarfik aamma akisussaaffigigaluarpaa, atuuffilli taanna uannga naalakkersuisuuffigineqalissaaq 
  • Steen Lynge Demokraatineersoq nunanut allanut tunngasunut nukissiuuteqarnermullu naalakkersuisunngussaaq.
  • Jens Immanuelsen (S) aalisarnermut, piniarnermut nunalerinermullu naalakkersuisuuginnassaaq. 
  • Martha Abelsen (S) isumaginninnermut inatsiseqarnermullu naalakkersuisuuginnassaaq. Taassuma peqqissutsimut naalakkersuisoqarfik ullumikkumut akisussaaffigigaluarpaa – taanna uannga naalakkersuisuuffigineqalissalluni
  • Demokraatinit Anna Wangenheim, taanna peqqissutsimut naalakkersuisuussaaq.
  • Jess Svane (S) suliffeqarnermullu ilisimatusarnermut avatangiisinullu naalakkersuisuuginnassaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat