Nivi Nielsen naggueqatitsinnut tusarnaartitsivoq

USA-mi illoqarfinni New Yorkimi aamma Texas-imi ulluni 14-ini tusarnaartitseqattaareernermi kingorna, Nivi avannamut Puvernertuumut tusarnaartitsiartorpoq, taamaalilluni ississiut 69 gradinik  nikittoq ullup ataatsip ingerlanerani misigaa.

Tasamani musikfestivaleqarnerani issittorsuugaluartoq, inuit nuannattorsuupput.

Festivali ullunik tallimanik sivisussuseqartussaavoq nipilersornermik tusarnaartitsinerit 20-t unnuit tamaasa tusarnaarneqarsinnaallutik. Ilaatigut maani Nunatsinni aamma ilisimaneqarluartoq, Kashtin-ikkunni erinarsortartoq, Florent Volant peqataassalluni.

Nunatsinnit aamma peqataavoq eqqumiitsuliortoq, Miki Jakobsen, taanna kiinarpalerluni qitinnermik takutitsivoq kiisalu nipilersorluni.

Festivaleqarnermi qimussimik sukkaniuttoqarpoq aamma illuikkiornermik sukkaneqqusaattoqarluni.

- Nunavimmi nipilersornerput pissarsiaqarnaqaaq - soorlu Kalaallit Nunaaniiginnarluni, tassami inuit ilassiortut imaaginnavikkamik ammaqalutillu, Nive Nielsen oqaluttuarpoq.

Nunavummut tikeraarneq Nunat avannarliit kulturikkut attaveqaataanit, Napamit, aningaasalersorneqarpoq. Nive Nielsenip nipilersortuisalu tusarnaartitsiartoqattaarnitik aallarteqqinnginnerini, maanna ulluni 14-ni uninngalaarallassapput.