Nivi Nielsen Kulturikkut aallartitatut
Kulturikkut Illorsuarmi, Katuami, nalliuttorsiualaarnikkut borgmesterip Asii Chemnitz Narupip, Kommuneqarfik Sermersuumi Kulturikkut siuarsaanermi ataatsimiititaliami aamma siulittaasuusup, 75.000 koruunit, ukkusissamillu eqqumiitsuliaq, Nive Nielsenimut tunniuppai.
Nunatsinni Nunattalu avataani kulturimut tunngassuteqartunik aaqqissuussisarnerni, inunnik kulturikkut malunnaatilimmik, ataatsimiititaliaq nassaarniarsimavoq. Taanna inunnik kulturikkut Kommuneqarfik Sermersuumi saqqummiisinnaasunik siunnersuuteqarsinnaassaaq, kommunimilu meeqqanut inuusuttunullu maligassiuisuussalluni, tusagassiuutinut nalunaarummi ilaatigut ima allassimavoq.
- Uagut nalitsinni nipilersortartuuvoq pikkorissoq immikkorluinnarlu ilisarnaatilik: Nipilersoriaatsini erinarsoriaatsinilu ilisarnarluinnartoq nammineq pigivaa, misigissutsit qamannga pisut uummativut attorlugit erinarsuutigisarpai, Asii Chemnitz Narup, Nive Nielsen pillugu oqarpoq.
Kulturikkut aallartitatut toqqagaasoq ima oqarpoq:
- Nunarsuatsinni inoqarpoq Kalaallit Nunaannut tunngassuteqartunik suli annertunerusumik paasisaqarusuttunik. Oqarsinnaavungalu, kulturikkut aallartitatut aappaatigut sulereerpunga, inuppassuarnimmi naapitsisareerpunga qeqertarujussuarmi nunagisatsinni inoqarneranik aatsaat allaat tusartunik. Kulturitsinnik sapinngisara tamaat siaruarterissaanga, Nive Nielsen oqarpoq.
