Nive Whitehorsemi appisimaarpoq
Canadap avannamut kitikanniani Yukonimi Whitehorse-imi, Adäka Culture Festivalimi, sapaatip-akunnerani kingullermi pernaammik pisumi, Nive peqataavoq, nipilersoqatigisartakkani angutaatinilu, Jan de Vroede, nipilersoqatigalugu.
Adäka isumaqarpoq "Qaamanermut nuigit", issittumi eqqumiitsuliortunut naapittarfittut eqqarsaataalluni. Nive kisimiilluni marlunngormat siullermik tusarnaartitsivoq, sapaatip akunnerata sinnera, erinarsortartut arnat Canadap avannarpasissuaneersut suleqatigalugit, workshoppertitsilluni.
Arnat issittumeersut taakku pingasut akissarsisitat, Nive Nielsen, Leela Gilday Northwestterritoriemeersoq, aamma Diyet van Lieshout Yukonimeersoq, workshoppertitsinermi pernaammik naapipput, erinarsoqatigiillutik, erinarsuusiorlutillu.
Suliaasa inernerat Whitehorse-imi Culture Centremi "Circumpolar Soundscape"-imik taallugu tusarnaartitsinermi ippassaanikkunni tusarnaarneqarsinnaasimavoq.
Erinarsuusiatik nutaat Nivep, Leelap Diyetlilu ilaatigut atorpaat, namminnerlu erinarsuusiatik aamma ilisaritillugit.
- Tusarnaartitsilluaqaagut - tusarnaariat nuannareqaatigut, nivissallu erinarsuusiaat nutaat ima nuannarineqartigaat, tuaviornerpaamik immiussinissartik allaat isumaqatigiissutigalugu, Jan de Vroede Whitehorse-imiit oqaluttuarpoq.
Nive Nielsen Yukonimut tusarnaartitsiartoqqinnissaminut aamma qaaqquneqareerpoq, Jan de Vroede oqarpoq.
Whitehorsiliarneq Nunani Avannarlerni Piorsarsimassutsikkut Attaveqaammit, NAPA-mit, aningaasaliiffigineqarpoq, Nive Nielsen angalaqqileruni Savalimmiunukassaaq, nammineq nipilersortartuni Götami G! Festivalimi tallimanngorpat arfininngorpallu nipilersoqatigissallugit.
