Nive VOX Pop Award-imi ajugaavoq

Erinarsortartup Nive Nielsenip nunatta avataani erinarsortarnera nuannarineqarluarpoq.
juulip 09-at 2010 05:53

Ilaatigut aasaq manna Europami nipilersornermik festivaleertuni nuannarineqarluarpoq, tamatumalu saniatigut ippassaq aamma kalerrinneqarpoq USA-mi nipilersornermut nersornaasiuttakkap arlaannaannut attuumassuteqanngitsup Independent Music Awardip, erinarsuusiullammattut nersornaaserlugu toqqarsimagaa. Nersornaat pissarsiarisaa taaguuteqarpoq VOX Pop awardi.

Nersornaat VOXS Pop tusarnaartartut erinarsortartunik nuannarisaminnik taasereernerisa kingorna tunniunneqartarpoq, Nive Nielsenillu erinarsuusiaa 'Pirate Song' immikkoortuni singer-songwriter-imi internettikkut 48.000-inik taaneqarluni nersornaaserneqarpoq. Taasisut nunani tamalaaneersuusut, aamma Nunatsinniit arlallit taaseqataasimasut Jan de Vroode, Nivep nipilersortartuineersoq oqaluttuarpoq.

- Qujanarujussuaq Nunatsinnit tapersersuisunut, assorsuaq nuannaarutigivara tapersersorneqarnera, Nive Nielsen nalunaarummini taama oqarpoq.

Nersornaat kalaallimit aatsaat pissarsiarineqarpoq. Internettimik atuisuinnaat Nivep nersornaat pissarsiarissagaa aalianginngilaat.

Nersornaasiinissamut naliliisunut ilaapput nunani tamalaani nipilersortartut tusaasamat, soorlu Tom Waits aamma Suzanne Vega aaliangeeqataapput Nivep erinarsuusiaata toqqarneqarnissaanut.

Erinarsortartoq Simon Lynge nersornaaserneqarnissaa aamma innersuussutigineqaraluarpoq, tamatumuunakkulli iluatsinnginngilaq.