- Marlunnik ukiulinnik marluliaateqarpunga angerlarsimaannarlunilu uisakajaarnarsinnaasarpoq, Nivi Nielsen oqarpoq.Assi: pressefoto

Nive Nielsenip isiginnaartitseqqaarnissaa corona pissutigalugu kinguartinneqartoq

Nive Nielsenip siullermeerluni isiginnaartitsinissaanut piareersarnerit coronap ajornartoortitsineranik sunnerneqaqaat.

Nipilersortartoq C.V. Jørgensen pillugu isiginnaartitsissutip tusarnaartitsinertallip siullermeerluni takuteqqaarnissaanut Københavnimi piareersarnerit, erinarsortartumut isiginnaartitsisartumullu Nive Nielsenimut naliginnaasuunngillat.

Isiginnaartitsisartut pingasoriarlutik sungiusareersullu coronavirusip ajornatoorutaaneranik sungiusarnerit unitsinneqarput.

- Tamaviat Ilungersorpugut, eqqumeeqaarli. Tassami aamma immitsinnut ilikkarnissarput pisariaqarmat. Nalinginnaagaluarpat sungiusareernerni imerniartarfiliartassagaluarpugut neriniartarfimmiluunniit nereqatigiittarluta. Tassami suli immitsinnut iluamik ilikkaratalu suleqatigiinniarsarigaluarpugut, Nive Nielsen oqaluttuarpoq.

Qitittaatsit videokkut ilinniarai

Isiginnaartitsisartut qulingiluaasut qarasaasiatigut attaveqaat Zoom atorlugu qitinnernik erinarsornernillu sapaatit akunnerni marlunni kingullerni sungiusaqatigiittarput.

Tamannalu unammillernarpoq, tassami qitinnermi  allorassaaqatigiinnissat isiginnaaruteerannguaq atorlugu sungiusarneqarput, attaveqaatillu ilaanni ajorsisarsinnaasartut, Nive Nielsen nassuiaavoq imalu nangilluni oqarluni:

AAMMA ATUARUK Nive Nielsen Disneyp isiginnaagassiaani: - Assorujussuaq pissanganarpoq!

- Marlunnik ukiulinnik marluliaateqarpunga angerlarsimaannarlunilu uisakajaarnarsinnaasarpoq. Uinga angerlarsimagaluartoq taamaattoq sungiusarnerma ingerlaavarnissaa akornuserneqartarpoq. Aamma napilluta suniusannginnerput uisakajaarnarpoq. Nalinginnaasumik sungiusarnissarput kissaatiginaraluarpoq, kisianni suliarput nangikkatsigu qujamasuppunga. Taamaatiinnarnissaanimmi pitsaaneruvoq,” Nive Nielsen oqarpoq.

Isiginnaartitseqqaarnissaa kinguartinneqartoq

Isiginnaartitsissusiap tusarnaartitsinertallip maajip aallaqqaataani isiginnaartitsissutigeqqarnissaa pilersaarutaagaluarpoq, coronavirusili akunnattoorutaammat isiginnaartitsisarfiit matoqqaannarallartussanut ilaasut danskit oqartussaannit sivitsorneqarmat, isiginnaartitsinissaq kinguartinneqarpoq.

- Isiginnaartitseeqqarnissarput maajip qulinganut siunniunneqarpoq, naluarpulli tamanna piviusunngussanersoq, Nive Nielsen oqarpoq.

Nive Nielseni iginnaartitsisarfimmi siullermeerluni isiginnaartitsisussaavoq. Isiginnaartitsisartutulli Disney-p filmiliaani Togomi peqataavoq aamma amerikamiut nangeqattaarluaanni, The Terrormi, inuttaalluni. Erinarsortartutut taalliortutullu inuuniuteqarpoq nipilersortartoqatinilu Nive & The Deer Children arlalissuarnik saqqummersitaqarlutik nunanilu tamalaani tusarnaartitsisarlutik. Taava aamma Danmarkimi ukiut qulit matuma siorna siullermeerluni tusarnaartitsinerminni C.V. Jørgensen naapippaa.

- C.V. Jørgensen ukiuni qulini tusarnaartitsisimanani Aarhusimi sapaatip akunnerani ataatsimi tusarnaartitseqattaarnerni tulleraluta tusarnaartitsivoq. Inuk pitsaalluinnartoq qanilaartorlu. Assut nuannaartorivara. Danmarkimi nipilersortartut pissaganarnerpaat ilagilluinnarpaat. Taalliai soqutiginarluinnartut inuiaqatigiinni pissutsinik isornartorsiuinernik immikkuullarilluinnartumillu isiginneriaaseqartut, Nive Nielsen oqarpoq.

Isiginnaartitsissusiaq tusarnaartitsinertaqartoq isiginnaartitsisarfimmi Aveny-T-mi takuteqqaarneqassaaq tamatumalu kingorna Aarhus Teaterimi aamma pilersaatutit naapertorlugit takutinneqassalluni.

Isummersuutit

Coronavirusimik tunillatsinissaq pinaveersaaruk

Nunatsinni coronavirusi pillugu killiffik

  Misissorneqareersimasut 8042
  Tunillanneqarsimasut 14
  Peqqisseqqittutut nalunaarutigineqartut 14
  Napparsimavimmi uninngasut 0
  Anersaartuuteqartitaasut 0
  Toqquteqartut 0
Pissarsivik: nun.gl
  Nutarterneqarpoq
  septembarip 29-at 2020 nal. 12:00