Nive Korea-mi nipilersussaaq

Korea Kujalliup præsidentiata, Lee Myung-Bakip Nunatsinnut septembarimi tikeraanerata kinguneranik, Naalakkersuisut siulittaasuat Kuupik V. Kleist, Korea Kujallermut decembarip aqqaneq-aappaanniit 16-iata tungaanut tikeraartussanngorpoq.
Allattoq Mads Lynge
novembarip 21-at 2012 06:32

Inuussutissarsiornermut naalakkersuisoq, Ove Karl Berthelsen aamma Ilinniartitaanermut naalakkersuisoq, Palle Christiansen peqataassapput, soorlu aamma Nunatsinni suliffeqarfiit arlallit angalanermut peqataatitaqassasut.

Angalanissamulli pilersaarutit pisortatigoortut suli saqqummiunneqanngillat.

Angalanermi peqataasussat ilagaat, kalaaleq arnaq erinarsuusiortarlunilu erinarsortartoq, Nive Nielsen.

Takornarnialerisut Greenland Todayip nittartagaani tamanna atuarneqarsinnaavoq.

Nive Nielsen nipilersortartunilu Europami maanna tusarnaartitsisaqattaartut, Greenland Todayimit oqaloqatigineqarput.

Kuupik V. Kleistip Korea Kujallermut tikeraarnissaa, Danmarkip Seoulimi aallartitaqarfiata aaqqissuusseqataaffigaa, Nive Nielsenillu tusarnaartitsinissaa aamma taakku aaqqissuuppaat.

- Korea Kujallermiut tv-kkut aallakaatinneqartussamik tusarnaartitsiffiginissaat pissanngatigaara. TV-qarfimmi EBS SPACE-imi aallakaatinneqartussamik tusarnaartitsissaanga, nipilersorneq pillugu aallakaatitami peqataassallunga, Nive Nielsen oqarpoq.

- Aamma "Korea National Media University"-mi  tusarnaartitsissaagut, pissangaqaagullu. Tulluusimaarutigeqaara, tusarnaartitsinitsigullu Nunatsinnik soqutiginninnerulersitsinissarput neriuutigaarput, Nive Nielsen, Greenland Todayimut oqarpoq.