Danmarkimi nipilersortarfiit imaassinnaavoq kalaaleq nipilersortartoq taanna tusarnaartitsiseqattaaleraat.
Danmarkimi festivalit Roskilde Festivalitut ittut kalaallinik nipilersortitsineq ajornerat isornartorsiorneqartereerpoq, Nive Nielsenip aamma nipilersoriaqquneqarneq ajornini tupigusuutigisimavaa.
- Nunat avannarlernut atatinnagu nipilersornikuuvugut, kisianni nipilersornivut sivikittuaraasarnikuugamik, massakkut sivisunermik siullerpaamik nipilersussuugut nunat avannarliit toqqammaviginagit, Nive Nielsen oqarpoq.
Danmarkimi nipilersortarfiit ornigarsinnaalerpisigit?
- Taamaalluarsinnaavoq, aamma Kodap saqqaaniiinnikuuvugut aamma aviisit assigiinngitsut allaaserillattaagamitigut.
Nive Nielsen nipilersortunilu The Deer Children siornatigut Kalaallit Illuutaanni, Nordatlantens Bryggemi, Tivolimi DR-illu Tv-kkut juullimi pilluaqqusinerani tusarnaartitsisareerput. Unnugu nipilersoreerunik nunarsuatsinni angalaaqqissamaarput.
- Ippassaanikkunni Norgemi nipilersorpugut, taava Danmarkimeereerutta USa-mut, Canadamut Nunavimmullu angalæanissarput pilersaarutigaarput.
Saqqummersitseqqissamaarpisi?
- Qaquguussanerpoq, kingullermituut angalaarnitsinnit immiussillataarujoorpugut, arlaanniaasiit ullaakkut iterumaarpugut naammassisoq, Nive Nielsen oqarpoq.
Nive Nielsenip unnugu Husetimi Musikcafemi tusarnaartitsinissaanut billetsit 60-it pallillugit pisiarineqareersimapput. Århusimilu 200-nut inissalimmi 15-iinnaagallartut pisiarineqarsimapput. Universitetimiilli ilinniarnertuut tusarnaariarrattut isilerunik aatsaat billetsisiortornissaat ilimanarpoq.