Niuffatsitsinermi kalaalerpaluttut kalaalerpaluginngilaat

Tivolimi juullimut niuffatitsisoqarpoq, kalaalerpaluttunillu aamma tuniniaasoqarluni, takkuttulli arlallit kalaalerpaluttut kalaalerpaluginngilaat.

Tivolimi juullimut niuffatsitsisoqarnerani amernik mersukkanik takuniaasut ilaat Ena Vilby taama isumaqarpoq. Taanna arnaq isumaqarpoq, sukujuit allat kalaalerpalunngitsut niuffatsitsinermi kalaalerpaluttunut tunngasortaani nioqqutigineqarpallaartut - kameeqqanik atisanillu takorusunnerugaluarluni. Taannali kisimi pakatsinngitsoq mersornermut tunngatillugu designeri Ajaaja Schmidt Pedersen oqarpoq.

- Takkuttut pakatsilaartarput, tamarmimmi amiinnaanngillat, nassuiaattarpakkali sooq taamaannersoq. Tassami puisip amia atorlugu meeqqat atisaanik sananeq akisoorujussuugami, taama oqarpoq Aasiammiu Ajaaja Schmidt Pedersen.

Taanna ukiut qulit sinnerlugit Danmarkimi najugaqarpoq, sulili kalaaliulluni misigaluni. Ajaaja isumaqarpoq, kalaalerpaluttunut tunngatillugu danskit atisanik amernik takusaqarusukkaangata tamanna qangarnisarpaluppallaartoq.

- Kalaallit atisaannut tunngatillugu ineriartornermut inuit malinnaanngippallaarput, uanga nammineq affarmik kalaaliuvunga affarmillu danskiullunga, massakkut atisat kalaalerpaluttut ineriartornikorujussuupput, taamaammat isumaqarpunga inuit ineriartornermut malinnaanngippallaarsimasut, Ajaaja Schmidt Pedersen oqarpoq.

Takuniaasulli tamarmik assigiimmik isumaqanngillat.

Isertut arlallit amernik atisalianik kusanartunik takorusukkaluartut takuniaasut ilaat aperineqarpoq qanoq isumaqarnersoq.

- Kalaallit Nunaanut tunngasut tamarmik amernut attuumassuteqartariaqaramiik? Karenni Hollandimiu akivoq.

Tivolimi niuffatitsisoqarnerani kalaalerpaluttunik aatsaat siullermeerluni nioqquteqartoqarpoq, kingulliussanngitsorli Ajaaja Schmidt Pedersen oqarpoq.

- Pingaaruteqartorujussuuvoq nunatsinniit peqataasoqarnissaa, tassami danskit aamma nunatsinni atisanik ineriartortitsineq malinnaaffigisinnaasariaqarpaat. Ajaaja naggasiivoq.