Niuertarfissuit Steen Lynge eqqunngitsumik paasissutissiinerarpaat

Kalaallit Nunaanni Brugsenimi Pisiffik A/S-imilu pisortaanerit naalakkersuisoq Steen Lynge eqqunngitsumik oqalunnerarpaat. Pisortaanerit taakku marluk isumaqarput Steen Lynge RAL assartuinermut akigititanik ukiuni kingullerni tallimani qaffaasimannginnerarlugu KNR-imut oqaaseqarsimanera innuttaasunut paasissutissanik eqqunngitsunik saqqummiussinerusoq.
Allattoq Peter Troelsen, Simon Uldum
januaarip 23-at 2014 13:18

Susanne Christensen Brugsenimeersoq Per Steen Larsenilu Pisiffimmeersoq isumaqarput assartuinermut akigititat ukiuni kingullerni tallimani 25 %-inik qaffariaateqarsimasut. Imaassinnaavoq assartuinermut aki taannaaginnartoq, akiliutigitinneqartulli qaffakkiartuinnarsimapput. Taakku pisortaanerit naatsorsuinerat malillugu 25 %-inik qaffariaateqarsimapput.

Akigititallu qaffariaateqaqqissappata tamanna atuisunit akilerneqartussaassaaq. RAL-ip aningaasatigut angusani 40 mio. kr.-inik pitsanngoriartinniassappagit atuisut kisimik akiliisussatuaassapput. Piffissami aningaasaqarnerup nalinginnaasumik siuariartorfiunngisaani akigititanik taamatut qaffaaneq pissutsinik ajorseriartitsiinnassasoq, pisortaanerit marluk nassuiaapput.

Brugsenip Pisiffiullu pisortaaneri RAL-ip aaqqiissutissamik allamik nassaarniarnissaanut kaammattorpaat, aammalu isertitaqarfiusinnaasunik nutaanik allanik nassaarniarnermi suleqataasinnaallutik neqeroorutigalugu. Taamaaliornikkummi inuiaqatigiit pisariaqanngitsumik sakkortuumik eqqorneqarnissaat pinngitsoortinneqarsinnaammat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq