Niuertarfinnut aalisartunullu ammassannik ukioq manna pilersuisoqassanngitsoq
Taamaammat nunatsinni niuertarfinni aalisartunulluunniit ammassannik neqitsertuuteqartartut ukioq manna ammassannik qerisunik pissarsisinneqassanngillat.
Qeqertarsuarmi tunisassiorfik nalinginnaasumik ammassannik tunisassiungaatsiartaraluarpoq. Tunisassiorfilli nalinginnaasumik 100 tonsinik tunisassiortartoq 20 procentiinnaanik ukioq manna tunisassiorsinnaasimasoq, tunisassiorfimmi ingerlatsisoq, Jakob Broberg Royal Greenlandip nittartagaani allappoq.
- Ammassaat silap nillernerujussua pissutigalugu sinerissamut tulakkusuppiarsimanngillat. Ilutigisaanillu saattuat ammassallu ataatsikkoortillugit tunisassiarisinnaanngeriaratsigit saattuat tunisassiarissallugit aalajangersimavugut, tunisassiorfimmi ingerlatsisoq allappoq.
Royal Greenlandip aappaagu 2019-imi taamalisooqqinnginnissaa Jakob Brobergip eqqanaarsarfigaa.
- Aappaagu saattuanik ammassannillu ataatsikkut tunisassiornissaq siunniupparput. Taamaammat silaannaarilluni poortuutissanik marlunnik inniminniivunga, taamaasilluta ataatsimik pigeriigarput iluaqutsiullugu sukkanerusumik tunisassiorsinnaassaagut niuertarfinnullu pilersuilluta, Jakob Broberg oqarpoq.
