Niuertarfiit juullimut ullumikkut niuffannersaarsuaqarnissaa naatsorsuutigaat
Nunatsinni niuertarfinnik ingerlatsisut anginerit pingasut ullumi ataasinngornermi aamma aqagu juulliaqqami juullimut niuffannersaarsuaqarnissaa naatsorsuutigaat.
Juulliaqqamummi aqagunnera siorna sapaammi pisoq, ukioq manna juulliaqqamut aqagunnera ullumikkut ulluinnarmi pivoq. Taamaattumik Brugsenimit, Pisiffimmit aamma Pilersuisumit juullimut niuffattunik ullumikkut immikkut ulapputeqarnissamut naatsorsuuteqartoqarpoq.
- Juullip ullui ukioq manna allaanerulaartumik inissisimaffeqarmata ullumikkut ulloq uatsinnut ulapaarfiussaaq. Juullimullu niuffattussat siornamut sanilliullugu amerlanerulaarnissaat ilimanarpoq, kisianni pisiniarfiit unnugu matuppata kisitsisit aatsaat takusinnaavagut, Randi Vestergaard Evaldsen Kalaallit Nunaanni Brugsenimi pisiortornermi pisortaq taama oqarpoq.
AAMMA ATUARUK Nuannisarneq, ataatsimoorneq aliasunnerlu: Juullimut misigissuserpassuupput
Pisiffimmiillu niuertoqarnissaanut ilimagisaat allaaneruallaanngillat:
- Illoqarfinni tamani decembarip 22-ata tungaanut ulapaartoqarnikuuvoq. Ullumikkullu, aqagulu juulliaqqami, juullimut pisiniartunit naggataasersortoqarnissaanut qilanaarpugut. Juulliaqqamummi aqagunnera ukioq manna ulluinnarmi pivoq, siorna sapaataasimasoq, Heine Stilling Jensen, Pisiffimmi pisiortornermut nittarsaassinermullu pisortaq oqarpoq.
Pilersuisumit ullumikkut ulloq aamma isumalluarfigineqarpoq:
- Maannamut juullernissaanut pisiortorfigineqarluarpugut, kisianni ullumikkut decembarip 23-ani isertitassagut iserteqqaartinnagit juullisiorluarsinnaanngikkallarpugut. Ullumikkummi isertitassat ukioq manna isertinneqartunit annertunerpaanut ilaassapput, annertunerpaajunngikkunik, Niels Andersen Pilersuisumi pisortaq oqarpoq.
Mamakujuit juullerpaluttut akii qaffanneqarsimanngitsut
Pilersuisumi pisortap ilanngullugu oqaluttuaraa Pilersuisup aalajangersimagaa mamakujuit juullerpaluttut akii qaffanniarnagit, naak ilaatigut sukkunut akitsuutit ukiap ingerlanerani qaffanneqaraluartut.
- Juullimut nioqqutissat piffissap sivikitsup, aalajangersimasullu, ilaani kisimik tunineqartarput, taamaammat Pilersuisumi aalangersimavugut juullimut mamakujuttut akiinik ukioq manna qaffaaniarnata, tamannalu pisisartutsinnit nuannaarutigineqarpoq, Niels Andersen oqarpoq.
AAMMA ATUARUK Akitsuutit atuutilinnginneranni: Brugsenip sioraasat tunisartagai 12-eriaammik amerlisut
Pisiffimmilu pisiniartartut mamakujuit juullerpaluttut, allallumi tungusunnissinnaasut, akikillisaanerini pisiarinerusarsimavaat:
- Tamakkualu tamaasa aamma neqerooruteqarfiginissai eqqumaffiginiarsimavarput, Heine Stilling Jensen oqarpoq.
- Mamakujuit juullerpaluttut sukkorpassuillu ulloq taanna akitsuutit eqqunneqartussanngorneri nalunaarutigineqarmat tunivagut, taamaattumik taakkunannga nioqquteqarnerput siornarnit allaanerussangunanngilaq, Randi Vestergaard Evaldsen, Kalaallit Nunaanni Brugsenimeersoq, oqarpoq.
Kalaallit Nunaanni Brugseni niuertarfinnik marlunnik ukioq manna ammaavoq. Tassa Ilulissani Brugseni aamma Nuummi Natalies. Ilulissanilu Brugsenimi juullilernerani tunisaqarluartoqarnissaa neriuutigineqarpoq.
- Juullimut niuerfigineqarluarpasippoq, tamannalu illoqarfimmi innuttaasut iluaqutigissavaat, Randi Vestergaard Evaldsen oqarpoq.
Aasiannili pissutsit allaanerupput. Tamaanimi Kommune Qeqertalik aalajangersimavoq qaammammusiat aatsaat decembarip naanerani tunniunniarlugit.
- Aasianni aatsaat decembarip 30-ani aningaasarsissapput, taamaammallu illoqarfimmi tassani kaaviaartitakinnerunerput malugisinnaavarput, Pisiffimmeersoq Heine Stilling Jensen oqarpoq.
