Niuernermik Ilinniarfimmi ilinniartut frikulanerat
Niuernermik Ilinniarfimmi Qaqortumiittumi TNI-mi ukiut pingajussaat ilinniartoq, Marie Grønvold aggustusimiilli ilinnialeramik tiimit 50-sit freersimapput. Frikulaneranullu pissutaavoq ilinniartitsisut pikkorissariartortarneri kiisalu pikkorissartitsisarneri. Marie Grønvold atuarfimmiit freeqattaarnitik qatsulluinnarsimallugu ima oqarpoq.
- Tupigissanngilara atuaqatigiilluta arlaliulluta dumperaluarutta, soorunalimi uagut kisitta pisuussutiginavianngilarput. Ullaakkut takkuttuaanartaraluarpugut, kisianni ilinniartitsisussaqarneq ajorpugut. Ippassaq eqqarsaraluarpunga atuarunnaaginnaruma immaqa iluarneruvoq, paasisaqarpiarnermi ajorama, Marie Grønvold oqarpoq.
Naammagittaalliornikuuisi ilinniartitsisoqartannginnersi pissutigalugu?
Aap. Niuernermik Ilinniarfimmi akisussaasunut naammagittaalliorlunga allannikuuvunga, akivaangalu klassitsinnut aggertoqassasoq friikulanerput oqaluuseriartorlugu. Kisiannili sosoqanngilaq, Marie Grønvold oqarpoq.
Qanoq misigisimanarpa naammagittaalliutit tusaaneqarneq ajortut?
- Soorunalimi sulisunut tatiginninnera millisorujussuuvoq. Misigisimasarpunga uagut ilinniartuulluta tusaaneqarata imaluuniit soqutigineqarata. Immaqa sulisut nalunngikkunikku ilinniartitsisut pikkorissarialersut ilinniartitsisut paarlattussaanik ujarlertarsimasinnaagaluarput, Marie Grønvold oqarpoq.
Qaqortumi Niuernermik Ilinniarfimmi pisortaagallartoq Grethe Gabrielsen ima pineqartumut oqaaseqarpoq.
- Suliffeqarfinni allanituulli Niuernermik Ilinniarfik, Qaqortumiitoq ilinniartitsisunik pissarsiortarnera ajornakusoorpoq. Pissarsioraangatta pinera tamaasa iluatsinneq ajorpoq, taamaammat sivisunerusumik napparsimasoqartillugu/peqanngittoqartillugu equsoorneq qanittuararsuusarpoq.
