Niuernermik Ilinniarfik Qaqortumiittoq qaartitsisoqarnerani eqqorneqarpoq

Qaqortumi pingasunngormat ualikkut qaartitsinermik ajortoortoqartoq, Qaqortumi politiit uppernarsarpaat.

- Eqqakkat kuuffianni qaartitsisoqarpoq, siunertarineqartutulli qaartitsisoqarnani. Taamaattoqarmallu Niuernermik Ilinniarfiup igalaavi uingasut ujaqqanik eqqorneqarlutik aserorput, Henrik Bjørch politiineersoq oqarpoq.

Inip ujaqqanik igeriunneqartunik eqqorneqartup adventureguidinngorniartunik ilinniartitsiffiunerani eqqorneqarpoq. Ilinniartitaanermullu pisortap, Rie Oldenburgip, ilinniartitsinerani qaartitsisoqarpoq.

AAMMA ATUARUK Ny fejlsprængning i Nuuk

- Sapaatip akunnera tamaat qaartitsitsisoqartarpoq, tamannalu sungiutereerparput. Siggartaammik marloriarluni kalerriisoqareeraangat qanngorpallattoqartarpoq, taava ilinniartitsineq nangittarparput. Aamma ullumi taamaaliorpugut, qanngornerali initsinnut tikiuppoq, igalaammi ujaqqanik tassanngaannaq eqqorneqarput , igalaamineqalerluni igalasserfiillu aserorlutik, Rie Oldenburg taama oqarpoq.

Ilinniartut pingasut igalaaminernik ujaqqanillu eqqortittut, ilinniartulli sinneri ajoqusinngitsut, Rie Oldenburg nassuiaavoq.

- Taakku pingasut napparsimmavimmukaatipallanneqarput, tassanilu misissorneqarput kimillannerillu salinneqarlutik. Tamatuma kingorna angerlartinneqarput, maannalu kollegiaminniillutik, Rie Oldenburg oqarpoq.

AAMMA ATUARUK Qaartitsisoqarmat aqqut matuneqartoq

Ilinniartut misigisartik oqaluuserereerpaat. Tarnilli pissusianik immikkut ilisimasalimmik ataasiakkaarlutik ataatsimoorlutilluunniit oqaloqateqarnissaminnik periarfissaqarput. Maannamulli ajunngitsut, Rie Oldenburg isumaqarpoq.

- Maanna qanoq innersut arlaallu nukinginnartumik ikiorneqartariaqarnersoq ilinniarfimmit paasiniarparput. Taammaattoqarpasinngilarli, Rie Oldenburg oqarpoq.

Qaqortumi politiit maanna misissuissapput, ilaatigut ilinniartut ingerlatseqatigiiffimmiillu qaartitsisuusumeersut oqaloqatigissallugit.