Niuernermi oqimaaqatigiissuseq amigartoorfiuvoq
Nunatta inuttussusaa eqqarsaatigalugu kisitsisit amerlasoorujussuupput. Tamakkiisumik isertittakkavut 13 mia. kruunit missaanniipput, Nunattalu karsiata kaaviiaartitai 6 mia. kruunit missaanniillutik. Taamaammat 2,2 mia. kruuninik amigartooruteqarneq annertugineqarsinnaavoq, nunanilu allaniittuugutta aningaasaqarnermut ministerit ernummatigissagaluaqaat. Nunatsinnili pissutsit allat atuupput.
Niuernermi amigartoortarnerput sungiusimavarput, tassami atortussavut tamaasa avataanit eqqussuuttariaqartaratsigit, soorlu nerisassat, atisat, pequtit, radiot, fjernsynit, qarasaasiat, biilit allarpassuillu.
Aalisakkat, qaleruallit pingaartumillu kinguppaat kisiisa avammut nioqqutigaavut.
Manna tikillugu allanik suli nioqqutissiunngilagut.
Niuernermili amigartooruteqarneq oqimaannerusumik tigusariaqanngilarput, tassami aningaasaqarnerput immikkuullarissumik aaqqissuussaavoq. Danmarkimit ataatsimut tapiissutit kiisalu EU-mit aalisarneq pillugu isumaqatigiissut atorlugit ukiumut aalaakkaasumik 3,8 mia. kruuninik pissarsivigisarpavut. Taamaalilluta atugassatsinnut nalinginnarnut aningaasaliissuteqarnissatsinnullu akissaqartarpugut.
Nunatsinni annertuumik sanaartortoqarneranik niuernermi amigartooruteqarnerup ersersiinnarpaa. Aningaasat ajunngitsumik atorpavut, siunissamut aningaasaliinernut taaneqarsinnaasunut, soorlu inissialiornernut, erngup nukissiorfiliornernut suliffeqarfinnullu aningaasat atorlutigit.
Niuernermi amigartoorutit affaasa missaat aningaasaliinernut tamakkununnga atorneqarsimapput. Suliassaqartitsineq eqqarsaatigalugu ajunngilluinnarpoq, inuiaqatigiinnullu iluaqutaalluni. Taamaattumik taama amerlatigisunik amigartooruteqarnerput ajortuinnaanngilaq.
Niuernermi kisitsisit qiviaraanni uuliamik eqqussuinerup annertuseriarujussuarsimanera takuneqarsinnaavoq. Tassa 49,3 procentimik qaffariarsimavoq, 2010-mi 322 mio. kruuninik qaffariarluni 975 mio. kruuninngorluni. Uuliamilli atuineq erngup nukissiuutiliornikkut milliartorpoq. Ilulissani erngup nukissiorfik 2013-imi naammassippat Nunatta nukissiornermik atuinerata 70 procentia nukissiuutinit ataavartunit pisalissavarput.
