Niuernermi oqimaaqatigiissummi amigartoorut appartoq
Avammut tunisakinneruvugut, nunatsinnulli tunisat aamma ikinnerupput. Ataatsimut isigalugu tamanna niuernermi oqimaaqatigiissaarnermi 2016-imut sanilliullugu 125 millionit koruuninik pitsanngoriaateqarpoq.
2017-ip qaammataani qulingiluani siullerni nunatsinnut 2973 millionit koruunit nalinganut nioqqutissanik eqqussuinermut aningaasartuuteqarpugut. Tamanna 177 millionit koruuninik tassa 5,6 procentinik appariarneruvoq.
AAMMA ATUARUK Nunatsinni tunisat pisiallu oqimaaqatigiinneranni amigartoorutit ikileriarput
Avammulli nioqquteqarneq 2016-imi piffissamut tassunga sanilliullugu aamma appariarpoq. Avammut nioqquteqarneq katillugu 52 millionit koruuninik tassa 1,9 procentinik apparpoq.
Taamaalilluni niuernermi oqimaaqatigiissut 271 millionit koruuninik amigartoorfiuvoq. Tamanna 125 millionit koruuninik pitsanngoriarneruvoq. Tassa avammut tunisat nunatsinnullu tunisat assigiinngissusaat 125 millionit koruuninik annikinnerulerpoq.
Niuernermi oqimaaqatigiissummi amigartoorut 2013-imiilli ataasiinnarmut ingerlavoq; ammut. 2013-imi qaammatini siullerni qulingiluani niuernermi oqimaaqatigiissummi amigartoorut 1,4 milliardiuvoq, 2017-imilu qaammatini taakkunani amigartoorut 271 millionit koruuniulluni.
AAMMA ATUARUK Aalisakkat pissutigalugit avammut tunisakinnerusugut
AAMMA ATUARUK Aningaasartuuteqarpallatta avammut tuniniaajunnaarpugut
