Niuerneq aporfeqartariaqarsorinngilaat
Naalakkersuisut inatsimmik allanngutissamik taama kinguneqartussamik siunnersuuteqarput, taannalu Inatsisartunit ullumi oqaluuserineqassaaq.
Tassalu kalaallit inuussutissarsiortut nioqqutissanik uuliasiorfinnut tuniniaasinnaanngussapput, taavalu nioqqutissat nunatsinnut eqqunneranni akitsuutinit akilersimasanit utertillugit.
Aningaasaqarnermut Naalakkersuisup taamaaliornikkut , Kalaallit niuertut niuertunut nunani allaneersunut naleqqiullutik aningaasartuuteqarnerunerat atorunnaarsinniarpaa. Tassami niuertut nunani allaneersut Nunatsinnukaqqaaratik taqussanik nioqqutissanillu allanik uuliasiorfinnut tunisigaangamik, Nunatsinnut akileraarutinik akiliineq ajorput.
Niuertut nunatsinneersut timmisartunut umiarsuarnullu nunanut allanut aallartunut tunisigaangamik, akitsuutinik akiliingitsoornissamut ullumikkut periarfissaqareerput.
Tassalu malittarisassat taanna aamma assersuutigalugu uuliasiorfinnut umiarsuarnullu uuliarsiortut atugaannut tunisinermi atorneqarsinnaalissaaq.
Inatsisartut ullumi ataatsimiinnissaanni oqaluuserisassanut aamma ilaapput, Nunatta, Savalimmiut Islandillu akornanni TV-kkut aallakaatitassianik paarlaateqatigiittarnissamik siunnersuut, innarluutillit efterskolertarnissaannik siunnersuut kiisalu imeruersaatinik qasuernartortalinnik meeqqanut tuniniaaqqusiunnaarnissamik siunnersuut.
