Siumut partiiani allattaasimasoq kinguaassiutitigut innimiineragaanermini suliffimminit soraarpoq. Toqqorsivimmit assiAssi: KNR

Nittartakkatigut tusagassiorfik: Arnat qulit Siumumit Mikael Petersen innimiilliorsimaneraraat

Sermitsiaq.ag-p allaaserisaa naapertorlugu Mikael Petersenip arnanut partiimut atassuteqartunut kinguaassiutitigut innimiilliorsimaneragaanini ilisarinngilaa.

Arnat allakkani qulini Siumup partiiata allatsigisimasaa, Mikael Petersen tulleriiaartumik qasseeriarluni kinguaassiutitigut innimiilliorsimanerarpaat.

Sermitsiaq.ag allakkanik tigumminnittoq taama allappoq.

Tusagassiorfiup allaaserisaa naapertorlugu tamanna Siumup siulersuisuunerisa marlunngornermat kingullermik ataatsimiinnerminni Mikael Petersenimik sulisussaajunnaarsitsinerannut pissutaavoq.

Mikael Petersen partiimi atorfimminit tamatuma kingorna nammineerluni soraarpoq.

Allakkat ilaanni arnat atiminnik saqqummiussipput, nassiussisulli amerlanerit kinaassutsiminnik isertuussipput. Sermitsiaq.ag-lli arnat taakku kikkuuneri ilisimavaa.

Allakkat assammik allagaasut

Allakkat assammik allagaapput, nassiussisullu ilaatigut partiip allaffeqarfiani siornatigut sulisimapput, kajumissutsiminnik suliaqarsimapput, Siumup inuusuttaanni ilaasortaapput  polikeriniluunniit ilaallutik.

Nittartakkatigut tusagassiorfiup arnat ilaat assersuutigalugu ima allagaqarpoq:

- Aperivaanga: Nuliasuttaarisinnaavakkit. Piumaguit sumulluunniit aallarsinnaavugut. Inimi angutit allat pingasut isersimapput taakkulu issiaannaarlutik illaannarput, arnat ilaat allappoq, nangillunilu:

- Ullu alla sofami issiallunga, saninnut ingippoq assanilu uppatinnut ileriarlugit oqarluni: 'Mamassaateeraq', assanilu arriitsumik nulumma tungaanut ingerlatillugu.

Mikael Petersenip unnerluutigineqartut ilisarinngikkai

Sermitsiaq.ag-p Mikael Petersen oqaloqatigaa taassumalu unnerluutigineqartut ilisarinngilai.

- Unnerluussutigineqartut ilisarisinnaanngilluinnarpakka, Mikael Petersen oqarpoq.

Siumup aaqqissuussaanermut siulittaasuata tulliata, Evelyn Frederiksenip suliat inunnut tunngasut partiimit oqaaseqarfigineqarusunngitsut tusagassiuutinut nalunaarummi allappaa.

- Siumup siulersuisuuneriniit saaffiginnissutinut akuersaarneqarsinnaanngitsumik iliortoqartarsimanera pillugu iliuuseqareerpugut. Siumumi atorfillit pillugit tusagassiorfinnut oqaaseqarnavianngilagut oqaaseqarnerlu ajorluta, Evelyn Frederiksen allappoq.

- Naggataatigut naqissusissavarput Siumumiit kanngutsaatsuliortarnerit suulluunniit akuersaarsinnaanngilluinnarmagit.

Mikael Petersenip Siumumi soraarsimanera siulersuisut uppernarsarpaat, taamaattumillu partiimut atassuteqarunnaarluni.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat