Nittartakkatigut nunatsinniit niuertut ikiornialerpaat
Kalaallit Nunaanni qarasaasianik atuisut Danmarkimi nittartakkani pisiniarnerminni ajornartorsiortarnerat imaluunniit pisisinnaasannginnerat qaangerniarlugu maanna qanoq iliuuseqartoqalepoq.
Amerlasuut naammattoortarpaat, qarasaasiakkut pisiniarnermi nalunaarutigineqartartoq, nioqqutissat tuniniarneqartut, Kalaallit Nunaannut Savalimmiunullu nassiunneqarsinnaannginnerat.
Maanna Danmarkimi allakkanik nassiussanillu sullissisarfik PostDanmark iliuuseqalerpoq, nioqqutissanik pilersuinermik suliaqartut aviisiat SCM taamatut allaaserisaqarpoq.
Kalaallit Nunaanni Savalimmiuni qarasaasiat atorlugit pisiniarnissamik soqutiginnittut Danmarkimi qarasaasiakkut nittartakkatigut nioqquteqartartunut nittarsaanneqarniarput.
- Qarasaasiat atorlugit Kalaallit Nunaannut Savalimmiunullu tuniniaaneq nassitsinerlu qanoq ajornanngitsigisoq qanorlu akikitsigisoq qarasaasiat atorlugit nioqquteqartartunut paasissutissiissutiginiarparput, amerlasuummi isumaqarmata akisunerusoq ajornarnerusorlu, Wilfred Yeung, Post Danmarkimi qarasaasiat atorlugit nioqquteqarnermi immikkut ilisimasaqartoq oqarpoq.
Wilfred Yeung Kalaallit Nunaannut tikeraaqqammerpoq, qarasaasiakkut pisiniartarneq qanoq annertutigineqarsoq pisariaqartinneqarnersorlu paasiniarlugu.
Danmarkimi qarasaasiakkut nioqquteqartartut Post Danmarkimit ilitsersorneqarsinnaalissapput, qanoq iliorlutik nioqqutissanik Kalaallit Nunaannut Savalimmiunullu nassitsisinnaanissaannik, aamma nioqqutissaatiminnik Kalaallit Nunaani nittarsaassinissamut periarfissaannik.
Poortukkat Danmarkimiit Savalimmiunut Kalaallit Nunaannut nassiunneqartarnerat, agguaqatigiissillugu ullut marluk affarlu atorlugit ingerlanneqartarput, PostDanmark taamatut nalunaaruteqarpoq.
