Nittartakkamik tuniniaaveqalerpoq
Nittartagaq nutaaq sapaatip-akunnerani kingullermi pilersinneqarpoq allattaavimmik (opslagstavlen-imik) atserlugu.
Nittartagaq aqqutigalugu akeqanngitsumik akikitsunnguamilluunniit allagarsiisoqarsinnaavoq. Soorlu assersersuutigalugu biili errorsivilluunniit tuniniarneqartoq allagarsiisoqarsinnaalluni.
Nittartakkamik pilersitsisuuvoq Thomas Nicolajsen Nuummeersoq. Taassuma nammineerluni arlaannik tuniniaanermini qanoq ajornakusoortiginersoq misigereeramiuk nittartagaq pilersippaa.
Illoqarfimmi allagartaliinermit interneti aqqutigalugu allagartaliineq ajornannginneruvoq, taama Nicolajsen oqarpoq.
Aamma allagartat Nunatsinni sumikkaluaraanniluunniit takuneqarsinnaanerat iluaqutaavoq, taamaalilluni illoqarfiit nunaqarfiillu akornanni niueqatigiinneq ingerlanneqarsinnaalerpoq.
Thomas Nicolajsen neriuppoq piffissap ingerlanerani agguaqatigiissillugu nittartakkami 300-400-t angullugit allagarsiisoqarsinnaalissasoq. Allagartaliussat www.opslagstavlen.gl –mi nanineqarsinnaapput.
