Kigutilissuup kigutaanik qiperukkat nittartakkakkut Inuit.dk.-kut suli tuniniarneqartuarsinnarput, naak nunat tamat isumaqatigiissutaat naapertorlugu tamanna unioqqutitsinerusoq. Nittartakkamilli ingerlatsisoq politiinit qanoq iliuuseqarfigineqarsinnaanngikkallarpoq:
- Kikkulluunniit nittartakkamik ammaasinnaapput, inatsisitigullu tunngavissaqaraanni aatsaat nittartakkamik matusisoqarsinnaavoq, nittartagarlu Inuit.dk matuneqarsinnaanissaa inatsisitigut tunngavissaqarsorinngilarput, Københavnip politiivini kriminalinspektøri Hasse Jakobsen oqarpoq.
Tupilaat kigutilissuup kigutaanik sanaat tuniniakkanut ilaapput, tamannalu Washington-konventionimik, tassa nunat tamat isumaqatigiissutaanik unioqqutitsineruvoq. Taamaakkaluartoq politiit susinnaanngikkallarnerarput, tamakkuninnga tuniniaasoq Danmarkimi najugaqanngimmat.
Asiap kangiatungaaniit tuniniaaneq ingerlanneqartoq aamma oqaatigineqarpoq. Hasse Jacobsen-ip oqaatigaa pisiniarfimmut imaaliinnarlutik iliuuseqarsinnaanatik Inuit.dk-ip tuniniaagaasa ilaasa inatsisinik unioqqutitsinani tuniniagaanerat ilimagineqarmat.
Københavnimi politiit tuniniaasup aqqa ilisimaaraat, Asiallu kangiani oqartussat tuniniaasumik tigusarinnissinnaanerannut periarfissaat killeqartut aamma Hasse Jakobsenip oqaatigaa.
Pinerluummut pineqartumut pineqaatissiisarneq sivisunerpaamik ukioq ataasiummat, politiit nunat allaneersut ikiortigineqarsinnaanngitsut aamma oqaatigineqarpoq.