Nittartakkakkut SMS-ikkullu piniartut tusarniarpaat

Pinngortitaleriffimmi ilisimatuut aalisartut, piniartut kiisalu pinngortitamik atuisut allat maanna attaveqarfigilluarniarsarilerpaat. Tamanna internettimi nittartagaq "Ilisimasavut"-mik qulequtalik aqqutigalugu ingerlanniarneqarpoq, tassalu innuttaasut ilisimatuullu nunatsinni pinngortitami aalisakkat piniagassallu pillugit ilisimasaqassutsiminnik paarlaasseqatigiilluarnerulernissaat eqqarsaatigineqarluni.
Allattoq Karsten Sommer, Knud Reimer
aggustip 17-at 2012 06:27

- Tassa nittartagaq Ilisimasavut aqqutigalugu aalisartut piniartut pinngortitamillu atuisut allat uagut ilisimatuujusugut attaveqarfigilerusuppavut, taamaasiorsinnaaguttami pinngortitatsinni pissutsit tamatta ilisimasaqarfigilluarnerulersinnaavagut, Pinngortitaleriffimmi pisortaq Klaus Nygaard taama oqarpoq, nittartakkallu "Ilisimasavut" kikkunnit tamanit atorneqarnissaa kaammattuutigalugu.

Tassa nammineq pinngortitamiinnermi misigisimasat nittartakkami tassani saqqummiussuunneqarsinnaapput, arlaannillu Pinngortitaleriffimmiunut apeqqutissaqaraanni nittartagaq taanna aqqutigalugu akissutinik pissarsisoqarsinnaassalluni.

Nittartagaq iserfiginiarukku pinngortitaleriffiup nittartagaa www.natur.gl iserfigeqqaartariaqassavat, tassuuna "Ilisimasavut"-up qupperneranut isertoqarsinnaavoq.

Qarasaasiaqanngikkaannili internetimulluunniit attaveqanngikkaanni SMS-ertoqarsinnaavoq imalunniit Ilisimasavut oqarasuaataanut 53 92 00-imut - tassa 53 92 00-imut sianerluni attaveqartoqarsinnaassalluni.

Aamma oqarasuaammut tassunga sianeruit kalaallisut qallunaatulluunniit oqaloqateqarsinnaavutit, Klaus Nygaard taama naqissusiivoq.

"Ilisimasavut" pillugit suliniut Danmarkimi avatagiisinut aqutsisoqarfiup aningaasaliineratigut piviusunngorsinnaasimavoq, tassalu periarfissaq taanna ullumimiit atorneqarsinnaanngorluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq