Nittartakkakkut piniarnermut allagartartaarsinnaanngorpugut
Pisortanit qangali kissaatigineqarpoq innuttaasut pisortanut saaffiginnittarnerisa pisariinnerulernissaa. Tamanna periarfissaalerpoq nittartagaq sullissivik.gl atorlugu. Taassuma saniatigut suli periarfissaavoq nammineq ornigulluni oqarasuaatikkulluunnii saaffiginninnissaq.
- Nem IDp inissinnissaanut naammassiniagassat Danmarkimi Dan ID suleqatigalugu sivisuumik inissinniarneqarsimapput, maannalu tassa killiffipput nalunaarutigisinnaanngorparput. Maanna qulakkeersinnaalerparput atuisut namminneq toortaanermikkut paasissutissat tunniussaasa kukkuneqannginnissaat. Qilanaarpugut sullissivik.glip atorlualernissaanut siunissamilu pisortanut saaffiginnissutaasartut tamarmik nittartakkakkut pisarsinnaapput, Sullissivik. gl-mi suliamut akisussaasoq Hans-Christian Sværd KNR.gl-mut oqarpoq.
Sullissivik.gl-mi iserfigineqarsinnaavoq "uannut tunngasut" assigiinngitsunut arlalinnut iseqqaanngikkaluarluni atorneqarsinnaasoq. Internetimik atuilluarsinnaasut tassani piffissamik sipaarsinnaapput taamaaqataanillu pisortat piffissamik sipaassapput innuttaasut pitsaanerusumik sullissinnaalissagamikkit.
- Siunissami pisortat innuttaasunik sullissinerat internet aqqutigalugu ingerlaalerumaarpoq. Danmarkimi borger.dk atorlugu tamanna ukiut arlallit periarfissaareerpoq. Maanna ukiup affaa missaliorlugu ulapputigisimavarput ullumikkullu killiffipput assut naammagisimaarparput. Tamanna Nunatsinnut inuinullu iluaqutaassaaq, Hans Christian Sværd oqarpoq.
