Nittartakkakkut isumasiuinerit tutsuiginartinngilaat

Inatsisartunut qinersinissamut atatillugu Sermitsiap inunnik isumasiuinerani Inuit Ataqatigiit 49 procentinit taaguunneqarpoq.
Allattoq Mads Lynge
apriilip 20-at 2009 16:20

Tamanna Inuit Ataqatigiit siulittaasuannit Kuupik Kleistimit nuannaarutigineqaraluarpoq, siusinaartumilli nuannaarujussuarnissaq Kuupik Kleistip mianersoqqussutigaa.

- Soorunami qiimaallannartorujussuuvoq, kisianni mianerisassat assigiinngitsut eqqarsaatigineqartariaqarput, aamma siusinnerusukkut misilittakkat eqqarsaatigalugit siusinaarpallaartumik nuannaarujussuarnissaq mianersuutigisariaqarpoq, Kuupik Kleist oqarpoq.

Taamatut internetikkut inunnik isumasiuisarneq naalakkersuisut siulittaasuannit Hans Enoksenimit apeqquserneqarpoq, Inuit Ataqatigiimmi qinersinermi ajugaasussatut suaarutigineqarnerat sukkavallaamik inerniliinerusoq taassuma oqaatigaa.

- Internetikkut isumasiuisarnerit tutsuiginassusaat apeqquserusuppara. Inuummi ataaatsip angerlarsimaffimminiit Sermitsiap nittartagaatigut taasisinnaavoq, suliffimmininngaanniillu aamma taaseqqissinnaalluni, taamaammat tutsuiginanngilaq, Hans Enoksen Radioaviisimut oqarpoq, nangillunilu:

- Inatsisartunut 2005-imi qinersisoqalermat aamma taamatorpiaq pisoqarpoq, Inuit Ataqatigiit siuariarujussuarnissaat eqqoriarneqaraluarpoq, taamaalisoqarnanili, naalakkersuisut siulittaasuat oqarpoq.

Qinersinermik naliliisartoq Sten Lund ulloqeqqaanerani Radioaviisimut oqarpoq qinersisartut isumasiuinermi oqariartuutaat qinersinermut sanilliullugu allaanerukkajuttartoq:

- Isumasiuineq soorunami soqutiginaateqarpoq, naalakkersuisulli ukiuni kingullerni ingerlatsinerat qinersisartunit apeqquserneqartarpoq, nutarterinissamillu aamma piumasaqartoqartalerluni. Maluginiagassaasorli aamma tassaavoq qinersisartut qinersivimmut iseraangamik nalunngisatik taakkajuttaraat, naliliisartoq Sten Lund taama oqarpoq. Qinersisartut 2296-it Sermitsiap inunnik isumasiuineranut peqataapput. Demokraatit 20 procentinit taaguunneqarput, Siumut 19 procentinit, naalakkersuisoqataalu Atassut 5 procentinit taaguunneqarluni.

Inunnik isumasiuineq alla, HS Analysemit suliarineqarsimasoq tallimanngorpat saqqummiunneqassaaq. Inuit 1000-it HS Analysemit apersorneqarsimapput partii sorleq juunip ulluisa aappaanni qinerniarneraat.

Inuit 2296-it Sermitsiap inunnik isumasiuineranut peqataapput. Demokraatit 20 procentinit taaguunneqarput, Siumut 19 procentinit, naalakkersuisoqataalu Atassut 5 procentinit taaguunneqarluni.