Nittartakkakkut angutinut pisinarfik nutaaq
Qaanaami sinerissalluunniit kujasinnerusortaasa ilaani najugaqaraluaruit, maanna toortagaq ataaseq tuuginnarlugu atisat nutaaliaasut ilinnut tulluarnerutitatit pisiarisinnaalerpatit. Ivik Motzfeldt 27-nik ukiulik, aamma Ingo Hansen 30-nik ukiulik nittartakkami pisiniarfimmik nutaamik Eskiman.gl-mik ammaaqqammerput.
-Illoqargisami atisaarniarfiit qinigassaatimikkut killeqangaatsiartartut, atisallu nutaaliaasut amerlavallaartannginnerat pissutigalugu, angutit sinerissamiittut qinigassatigut periarfissikkusuppavut, Ivik Motzfeldt knr.gl-mut oqarpoq.
Nittartakkakkut pisiniarfimmik ammaasut isumaqarput, angutinut atisanik nutaaliaasunik pissarsiniartarneq nunatsinni killeqarpallaartoq. Taamaattumillu amerlasuut aasakkut sulinngiffiup nalaani, assersuutigalugu Danmarkimut angalanerminnut atatillugu aningaasarpassuit atorlugit atisarsisarnerat takornartaajunnaarsimasoq.
-Nittartakkakkut atisanik niiverfiit unammillernianngilagut, assersuutigalugulu smartguy atugaangaatsiartuuvoq. Uagulli takutikkusupparput suliffeqarfiulluta Kalaallit Nunaanni inissisimasoq, ammaasut ilaatigut tusagassiutitigut taama nalunaaruteqarput.
Nittartakkakkut pisiniarfik pingasunngormat pisortatigoortumik ammarneqarpoq, maannamullu saaffiginnissuterpassuit facebookikkut, e-mailikkut oqarasuaallu atorlugit saaffigineqallattaalereersimavoq.