Nittartagaq nutaaq pingasunngormat atulersinneqarpoq. Taanna Naalakkersuisut pisortat ingerlatseqatigiiffiutaannut ilaasortassarsiornermut atorneqartassaaq. Toqqorsivimmit assi.Assi: Camilla Dam/KNR

Nittartagaq nutaaq pisortat piginneqatigiiffiutaanni atorfinitsitsiniarnermi ammasuunissamik qulakkeerissasoq

Pisortat suliffeqarfiutaani siulersuisunut ilaasortanik nutaanik toqqaanissamut avataanit ingerlatseqatigiiffimmik peqataasoqartassaaq. Ilorraap tungaanut alloriarnerusoq, iloqqorluttoqartarneranik nakkutilliisoq oqarpoq.

Nittartagaq nutaaq Namminersorlutik Oqartussat piginneqatigiiffiutaanni, soorlu Royal Greenlandimi, Air Greenlandimi Telepostimilu nutaanik ilaasortassarsiornermi ammasuunermik ersarissumillu ingerlatsinissamik qulakkeerutaasassaaq.

Naalakkersuisut tusagassiuutinut nalunaarummi taama allapput.

Nittartagaq taanna www.bestyrelser.gl-imik ateqarpoq, ingerlatseqatigiiffillu nBoard, nutaanik ilaasortassarsiornermi siulersuisunut ikiuinermik immikkut ittumik suliaqartartoq suleqatigalugu ineriartortinneqarluni.

- Suleqatigiinnikkut siulersuisunut ilaasortassarsiornerup tunngaviata nukittunerunissaa taavalu ilaasortassarsiornerup ersarissuunissaa, ammasuunissaa amerlasuunillu qinigassaqarluni pinissaa qulakkeerniarparput, Ingerlatseqatigiiffinnut allattoqarfimmi pisortaq, Lars Balslev oqarpoq.

- Taakkorpiaat iliuutsip nutaap qulakkiissavai, siammarteriffimmullu nutaamut taavalu Namminersorlutik Oqartussat ingerlatseqatigiiffiutaasa siunissaannut isumalluartorujussuuvugut, pisortaq tusagassiuutinut nalunaarummi oqarpoq.

Ima ingerlanneqartassasoq

Namminersorlutik Oqartussat piginneqatigiifiutaanni siulersuisunut ilaasortanngorusuttut tamarmik nittartakkamut www.bestyrelser.gl-imi imminut ilisaritissummik pilersitsissapput.

Taava Namminersorlutik Oqartussat suliffeqarfimmi aalajangersimasumi siulersuisunut ilaasortassamut piumasarineqaatitik assigiinngitsut oqaatigisassavaat.

AAMMA ATUARUK Siulersuisuni ilaasortanik toqqaanerit isertuaatsumik pinissaat Transparencyp piumasaraa

Taava nBoard assersuutigalugu aningaasaqarnermut pikkorissuseqarnissamut, tuniniaanermut, pilerisaarinermut, aqutsinermut piginnaasaqartunut piumasaqaatinik imaqartumik saqqummiussisassaaq.

Taava nittartakkakkut ilaasortaasut qinnuteqarnissaminnut periarfissaqassapput.

Qinnuteqarnissamut ullussaritinneqartoq qaangiukkaangat nBoard qinnuteqartunit tallimanit sallersanik toqqaasassaaq Naalakkersuisunullu naammassinnittussanut suliamik naammassinnittussanut ingerlatitseqqissalluni.

Transparency siusinnerusukkut isornartorsiuisoq

Peqquserluttuliornermik pinaveersaartitsinermut suliniaqatigiiffiup, Transparency International Greenlandip Naalakkersuisut nunatsinni siulersuisunut atorfinnik toqqaasarneranni mattoqasuuallaarnerarlugit siusinnerusukkut isornartorsiornikuuaat.

Naak ingerlatseqatigiiffiit pisortanit pigineqaraluartut Naalakkersuisut siulersuisuni assigiinngitsuni ilaasortassanik qanoq toqqaasarnerat innuttaasut takunniffigisinnaasimanngilaat.

Nittartagarli toqqaariaaserlu nutaaq ilorraap tungaanut alloriarnerusoq, siulittaasoq, Birita i Dali erseqqissaavoq.

- Toqqarneqartoq sooq toqqarneqarnersoq taannalu ingerlatseqatigiiffimmit pisariaqartinneqartutut qanoq piginnaaneqarnera inuiaqatigiinnut ersarinnissaa kissaatigaarput. Tamanna maannamut pitsaasimanngissoraarput.

- Atuuffinni taakkunani eqqortunik piginnaanilinnik issiasoqarnissaa kalaallinut inuiaqatigiinnut kalaallillu aningaasaqarnerannut pingaaruteqarluinnarpoq, siulittaasoq oqarpoq.

AAMMA ATUARUK Pisortat ingerlatsiviisa qassiiusut naligiissitaanermut inatsit malinngikkaat

Taamaammat siulersuisunut ilaasortassanik toqqaasarnerup ammanerulernissaa ersarinnerulernissaalu ajunngilluinnartoq, Birita i Dali naliliivoq. Taassumalu oqarnera naapertorlugu toqqagassanik avataaniit inassuteqartoqartarnissaa aamma pingaaruteqarpoq.

- Ilorraap tungaanut alloriarnerusoq ersarippoq, taanna oqarpoq.

- Kisianni nittartagaq una ingerlatseriaaserlu nutaaq upernaaq manna misilitaassaaq, tassami siulersuisunut ilaasortanik toqqaasoqassaaq. Toqqaaniarnerulli naggataata tunga ammasumik ersarissumillu ingerlanneqassanersoq soqutiginartuussaaq, siulittaasoq oqarpoq.

Naalakkersuisummi naggatata tungaani toqqarneqarsinnaasunit tallimanit aalajangiissasut taassuma erseqqissaatigaa.

- Naalakkersuisut toqqagassanit taakkunannga tallimanit toqqaanngikkunik taava neriuppunga tamatuma suliarinera ammasuullunilu ersersinneqassasoq, Birita i Dali oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat