Nittartagaq matuneqarpoq

Sverige Danmarkimisulli Muamaamik titartakkat peqqutigalugit ajornartorsiorusunngilaq, taamaattumik Sverigemi nittartagaq titartagartalik matuneqarpoq. Sverigemi isertortumik paasiniaasartoqatigiit nunanullu allanut ministereqarfiup akuliunnerata kingorna nittartagaq matuneqarpoq.

Sverigemi isertortumik paasiniaasartoqatigiit nunanullu allanut ministereqarfimmi sulisup nittartagaatilik attaveqarfigisimavaat tamatumalu kingorna nittartagaatillip aalajangersimavaa nittartagaq matuniarlugu.

Nittartagaatilik Sverigemi naalakkersuinermik suliaqartunik isornartorsiuisartuuvoq assigiinngitsunillu nittartakkakkut saqqummersitsisarluni.

Sverigep radioani nutaarsiassaqartitsvimmi pisortap nittartakkamik matusineq pillugu oqarpoq Sverigemi oqartussat akuliuttariaqanngikkaluartut.

- Tamat oqarsinnaatitaanerat oqartussaasunit killilerneqanngisaannaraluartoq aatsaat killilerneqartoq uanga misigivara, Sverigep radiuani pisortaq oqarpoq.

Danmarkimi naalakkersuisut tamat oqarsinnaatitaanerata aqqani tusagassiorfiit suliaannut akuliunnaveersaarsimapput. Sverigemili nunanut allanut ministerip tusagassiutit nittartakkamik saqqummersitseqqunngilai.

- Svenskit inuunerat ulorianartorsiortinneqarsinnaavoq. Libanonimi TV-eqarfiup nalunaarutigisimavaa Sverige aamma titartakkat saqqummersinneqarsimasut Syriamilu svenskit aallartitaqarfiat siorasaarneqarsimasoq, Sverigemi nunanut allanut ministeri oqarpoq.

Sverigep radioani pisoq aalassatitseqaaq. Nutaarsiassaqartitsinermillu pisortaq nipangersimaannanngilaq:

- Muuamaamik titartakkat siaruartorujussuupput. Maanna maani Sverigemi tamat oqarsinnaatitaanerat kiisa killilersorneqalerpoq.

Norskit aviisianni januaarimi titartakkat saqqummiunneqarsimammata aaqqissuisuuneq utoqqatsereerpoq.

Naaggaartut aviisianni aaqqissuisuuneq, Wæbjørn Selbæk oqarpoq, titartakkat saqqummersissimagamigit peqqissimilluni muuamaakkormiullu anniartissallugit kamatissallugillu ilimagisimamannginnamiuk saqqummersitsisimalluni.