Nittarsaassisussat nunnipput

Timersortut qanoq angusaqarnissaat kisimi nakkutigineqarnavianngilaq Arctic Winter Games-eqarnerata nalaani. Kalaallit peqataasut eqqaatissinneqareerput timersortartorpalaartumik takutitsineq ajugaanertut naleqartigisoq.

Air Greenlandip timmisartorsua Norsaq Whitehorse-mut mippoq tallimanngornermi ualigaa kalaallit timersortartut same-llu unammiartortitaat ilaasoralugit. Maanna nalunaaquttap akunnerinik tallimanik nikinganeq sungiunniassavaat sapaammi ualikkut arsaattut siulliit unammilinnginneranni, timersuutinilu allani unamminerit ataasinngorpat aallartissapput. Tamannali sioqqullugu unammiartortut eqqarsaatissinneqarput.

- Eqqaamassavarsi nunatsinniit immikkut toqqagaasimagassi. Tamanna akisussaaffimmik nassataqarpoq tassalu Nunarput sapinngissamik pitsaanerpaamik nittarsaattussaagassiuk, timersoqatigiit kattuffianni GIF-mi siulittaasoq Nuka Kleemann Norsamik Whitehorse-p tungaanut ingerlaarnermi peqataasussanut oqaaqqissaarivoq.

Angusalli uani kisimik pineqanngitsut timersortartunut eqqaasitsissutigaa.

- Unammisarsi ataqqissavarsi unamminerup nalaani aamma unamminerup kingorna. Hodgson Tropheep ukiormanna pissarsiarinissaanut tamanna aqqutissaasinnaavoq, Kleemann oqarpoq.

Hodgson Trophee tassaavoq Arctic Winter Gamesimi nersornaatit ataqqinarnersaat. Taanna nunamut timersortartorpalaartumik takutitsilluarnerpaajusmut tunniunneqartarpoq. Nunarput marloriarluni tassannga pissarsereerpoq tassalu 1994-mi aamma 2002-mi.

Timersortartut 2.000-it missaanniittut Whitehorse-mi timersortarfissuarput Canada Games Centerimut sapaammi unnukkut isaassapput arfininngornerup tungaanut unammersuassallutik. Marsip qulingani naggataarnersiornermi Hodgson Trophee-mik pissarsisut nalunaarutigeqassapput.

Air Greenland GIF-mi pingaarnertut aningaasaliisutut aamma nunatsinniit timersortartorpalaartumik takutitsilluarnerpaamut akissarsititsissaaq. Sungiusaasut aqutsisullu tassani toqqaasuussapput angerlamullu ingerlaarnermi kina "ambassadøritsialattut" toqqagaanersoq nalunaarutigineqassaaq.

Arctic Winter Games-imi angusat KNR.gl-imi aamma GIF.gl-mi takusinnaavatit. Aamma radioaviisimut Qanoruumullu ilanngutassiortoqartassaaq.