Nittarsaassinissamik isumaqatigiissuteqarput

juulip 15-at 2007 15:23

Timmisartuutileqatigiiffik Air Greenland aamma takornariaqarnermik siunnersuisoqatigiit Greenland Tourism nunanut allanut nittarsaassinermi suleqatigiilernissaq pillugu isumaqatigiissuteqarput.

Air Greenlandip aamma Greenland Tourismip pitsaanerusumik nittarsaassisilerumallutik aningaasat nittarsaassinermut immikkoortittakkatik ataatsimoortilissavaat.

Suliffeqarfiit pilersaarutaat oqartussanit akuerineqassappata aningaasat katillugit 5 million koruunit 8 million koruunillu akornanniittut nittarsaassinermut atorneqartalissapput.

Air Greenlandip pisortaanera Michael Binzer nutaarsiassaqatitsivimmut Travel People-mut oqarpoq, USA salliullugu nittarsaassivigineqassasoq, taamaaliornikkut Air Greenlandip Baltimore-mut timmisartuussisarnera nukittorsarniarneqarluni. Tamanna pereerpat Europami: siullermik Danmark, taava Tyskland Tuluit Nunaallu nittarsaavigineqassapput.

USA-mi sulisoqalernissaq pillugu Danmarkimi takornariaqarnermut siunnersuisoqatigiit VisitDenmark nunatsinni takornariaqarnermik siunnersuisoqatigiit siulittaasortaavata Bjarne Eklundip sapaatip-akunnerata tullianit isumaqatigiinniarfigalugit aallartissavai.

- Isumaqarpugut USA-mi sulisoqalernissaq pitsaassasoq, sulisussap USA-mi susoqarnera qanimut takusinnaanngussagamiuk. Isummakkut aningaasatigulluunnit nikeriartoqassagaluarpat New Yorkimiittuuteqalerutta qisuariapallassinnaanngussaagut. Michael Binzer nassuiaavoq.

Suliffeqarfiilli suleqatigiinnissamik isumaqatigiissutaat siulersuisuinit akuerineqaqqaassaaq.

Imarpik ikaarlugu takornarianik amerlanerusunik timmisartuussisalernissamik ukiunut tallimanut tulliuttunut pilersaarummik suliaqaqqullugu Michael Binzer aamma suliakkerneqarsimavoq.