"Nissimaat nissimaajaqqallu" siunnersuutaapput

Meeqqat inuusuttuaqqallu atuagassaannik nunani avannarlerni killerni atuakkiullaqqinnerpaamut nersornaat, 60.000 koruuninik aningaasartalik, Atlantikup Avannaani Suleqatigiit Savalimmiuni ukiumoortumik ataatsimeeqatigiinneranni ullumi tunniunneqassaaq.

Nunatsinniit nersornaaserneqartussatut siunnersuutigineqarpoq atuakkiortup Grethe Guldagerip atuakkiaa ” Nissimaat nissimaajaqqallu”.

Atuakkiamik nersornaasiisoqarnissaanut siunnersuutit siorna decembarimi tunniunneqarput, Grethe Guldagerillu saniatigut, atuakkiortoq Islandimeersoq, ataaserlu Savalimmiuneersoq, aamma siunnersuutigineqartut tassaapput, islandimiu Sigrun Eldjarn, taassumalu atuakkiaa”De frosne tæer” aamma savalimmiormiu, Bardur Oskarsson, atuakkiaalu” En hund, en kat og en mus”.

Grethe Guldagerimik siunnersuuteqarnerminni toqqaasartoqatigiit tunngavilersuutigaat, ” Nissimaat nissimaajaqqallu” nunatta ilisarnaataanik ulikkaaraluarluni, piffissaq nunarsuarmilu sumiinneq apeqqutaatinnagu atuarneqarsinnaammat. Atuakkiortumik nersornaasiineq Savalimmiuni Hotel Føroyar-mi ullumi nalunaaqutaq ataatsimut pissaaq.