Nissan biililiaminik utertitsiortortunut ilannguppoq
Kukkuneq ajutoornermik ajoqusernermilluunniit suli kinguneqanngitsoq, Nissanimit DR-ip nittartagaanut oqaatigineqarpoq.
Kukkuneq tassaanerarneqarpoq bremsinut tukertarfiata aalanera, tamatumalu kinguneranik bremserniarnerup ajornartorsiutaalersinnaanera. Nissanimit isumaqartoqarpoq, suliffeqarfiup biililiorfimmit sulisitap kukkusumik tunisassiornera tamatumunnga pissutaasoq.
Lastbiilit ilaasa aamma biilit usisaatit ilaasa kukkuneqarneri iluarsineqartariaqassanersut Nissanimit misissorniarneqartoq, biililiorfimmit tusagassiuutinut nalunaarummi oqaatigineqarpoq.
Biilit amerlanersaat USA-mi utertinneqareerput, taamaattorli Canadami, Mexicomi, Ukrainemi, Ruslandimi, Taiwanimi Kangianilu Qiterlermi nunat ilaanni biilit aamma uterteqquneqarput.
Nunatsinni Nissaninik tuniniaasoq Polar Auto Nuummiittoq uterteqqusinernik tusagaqarsimanngilaq.
- Nissanimit suli saaffigineqanngilagut, aamma tunisiffigisatta ajornartorsiuteqarsinnaanerannik suli tusaqanngilagut, Jens Egede, Polar Automeersoq oqarpoq.
