Nipisaat amerlassusaat ilisimaneqanngilaq

Arnarluit suaat suliffeqarfissuarmut  Royal Greenlandimut ukiormanna tunineqartut siornamut sanilliulugit amerlanerulluinnartut oqaatigineqarpoq, aamma kilomut akigitinneqartut qaffasinnerullutik.

Nipisaat qanoq amerlatiginersut ilisimavallaanngilarput, pisarineqartartummi amerlassusii kisiisa tunngavilugit pisassanik innersuussisinnaanngilagut, Kaj Sünksen Pinngortitaleriffimmi ilisimatooq  oqarpoq.

Arnarlunniarnermi killilersuisoqanngippat aalisakkat taakkua ikilerujussuarsinnaanerat ilisimatuup ernumassutigaa.

Umiatsiaararsorlutik ukiuni kingullerni nipisanniartartut aalisarluarsimanerisa kingunerisaanik pisarineqartartut amerlisimanersut ilisimanngilarput, nipisalluunnit amerlisimanersut, Kaj Sünksen oqarpoq.

- Aalisartut sumi aalisarnerlutik qassinik qassuteqarsimallutik qasseriarlutillu amuarsimanerlutik nalunaarsuisalertuuppata nipisanniartarneq nalilersuiffigisinnaalissavarput, pisassiinissamullu siunnersuisinnaalerluta,  Kaj Sünksen Pinngortitaleriffimmi ilisimatooq oqarpoq.
 
Nipisaat nunatta imartaani suffisartut ukiui Pinngitortitaleriffimmit ukioq manna misissuiffigineqassasut, Kaj Sünksenip ilanngullugu oqaatigaa.