Nipilersuummik tusarnaarlutit immaqa pujortarunnaarsinnaavutit
- Pujortartarnerup navianassusia pillugu naveersiinnarani suliniut "Healt For A Life Without Tobacco" allatut iliorluni nipilersortartullu ikiorsiullugit aallartitsivoq.
- Pujortarunnaarnissamut eqqarsarluarluni kajumisitsilissaaq, suliniummi oqaaseqartartoq Jesper Schau Hansen. Tupaliortut inuit pujortalersittarpaat ataqatigiinnermut misigitilerlugit, Jesper Schau Hansen oqarpoq.
- Uumannga erinnamik aamma taamatut misigititsilerniarpugut pujortarunnaarnissamulli sammilluni, torrattumik iliuutigaluta.
Erinarsuutip oqariartuutaa ersarippoq:
- Sikaritsinut asanninneq pinngitsuuisinnaajunnaarsitsisarpoq, pinngitsuuisinnaajunnaarnerli taanna peqqinnanngilaq.
Erinarsuutip Europami tamarmi nuannarineqalernissaa annertuumik sulissutigineqarpoq.
- Inuit assigiinngitsut nalunngisatta Europami erinarsuutip siammarternissaanut ikiuupput nittartakkanilu, amerlanerpaani aaneqarsinnaalluni, Jesper Schau Hansen oqarpoq.
Erinarsuutip inuusuttut pujortarunnaarsissanerai Hjerteforeningimi peqqinnissamut pisortap Ingrid Villingip qularikujuppaa, taamaattorli pujortartartutut kultureqarnerup ingalassimatinnissaanut iluaqutaasinnaanissaa oqaatigalugu.