Nipilersukkat allakajaat nunaqarfimmiut tusarnaartalissavaat
Kalaallit Nunaanni nunaqarfimmiut nipilersukkanik immikkuullarissunik tusarnaarnissaminnut immaqa aappaagumiit qilanaarsinnaalerput, erinniarsuarnik nipilersortartoq kalaaleq Knud Seblon guitarernermillu ilinniartitsisorisimasaa, Erling Møldrup, tusarnaartitsiartorlutik nunarfinnut angalaassallutik aalajangermata. Atuagagdliutini ullumi saqqummersuni taama allaaserinnittoqarpoq.
45-nik ukiulik, Knud Seblon, Kalaallit Nunaanni ukiorpanni nipilersortareerpoq, erinniarsuarnillu guitarerluni CD-liaa sulleq 1990-ikkut aallartilaarneranni saqqummerpoq.
Ilinniartitsisunilu, Erling Møldrup, sinerissami illoqarfinniunerusoq ukiuni kingullerni tusarnaartitsisareerlutik, nunaqarfinnut tusarnaartitsiartornissartik maanna aalajangerpaat, kalaallillu erinniaannik sallaatsunnguanik ilisimaneqarluartunillu nipilersortarnissartik siunniuteqqavaat.
Nunaqarfinni qulini ukiumut tusarnaartitsisarnissartik Knud Seblonip Erling Møldrupillu siunniuppaat, taamaalillutik nunaqarfiit tamaasa ukioq 2012-imi tusarnaartitsivigereersimassallugit guitarertartut taakku naatsorsuutigaat.
