Nipilersortartut malleraluartoq kangerlummi tusarnaartitsipput
Oqaluffimmi ilunngunartumik tusarnaartitsisoqaqqaarpoq, meeqqat Uummannameersut Nuummilu Meeqqat Illuaneersut agiarlutik erinarsuut Anaana filmimit Inummeersoq atorpaat. Erinaq taanna Uummannami Meeqqat angerlarsimaffiannut pigitinneqarpoq. Ron Davis Alvarez El Sistemameersoq aqutsisorineqarpoq.
Tamatuma kingorna nipilersoqatigiit inuussutissarsiutigalugu nipilersortartunik immikkut katitigaasut Islandimeersut, Norgemeersut, Walesimeersut, Danmarkimeersut, Savalimmiuneersut, Venezuelameersut Nunatsinneersullu tusarnaartitsipput. Nuuk Byorkester tikeraartullu kalaallit erinarsuutaannik nipilersorlutik naggasiipput. Oqaluffimmi tusarnaartitsisoqareermat silami kalattuunik unikkaanillu tusarnaartitsisoqarpoq, inuillu ussapput erinarsoqataallutillu.
Qoorngormiut nipilersortartunut qujassutitut erinarsuutertik tusarnersoq attortinnartorlu ’Qoornunnguaq nuna’ oqaluffimmi erinarsorpaat. Kingorna Qoorngormiut katersortarfimmi kaffillerlutillu kaagillerput. Nipilersoqatigiinnik katerisimaartitsineq Arnannguaq Gerstrømimit siuttuuffigineqartoq, Kommuneqarfik Sermersuumi Nipilersornermik Ilinniarfiup aaqqissuussaraa. Nipilersortartunik katerisimaartitsinerit tullissaat Islandimi 2014-imi pissaaq.
