Nipilersortartup kræftertut ikiorusuppai

Nipilersortartup Søren Alaufesenip Aasianni inunngortup, qangali naammasserusuttakkani piviusunngortilerpaa.

Maanna cd-liulerpoq isertitallu Neriuffiit kattuffiannut tunniunneqassapput.

- Amerlavallaarujussuarput kræftimik nappaatillit suliaritikkiartornerminni artornartoqaqisumi kisimiillutik angalasartut. Aningaasat qanigisaasut angalaqataasarnissaannut atorneqartussanngorlugit katersorneqassapput, Søren Alaufesen KNRip aallakaatitaanut Iterluarnaamut taama oqarpoq.

Søren Alaufesenip anaanani Pauline Alaufesen nappaassuaq kræfti pissutigalugu 1980-ikkunni annaavaa. Anaanamilu napparsimanerata nalaani migisani ukiuni qulikkaani pingasunngulersuni anniaatigisarsimavaa.

- Nukaralu Kangerlussuaannarmut anaanarput qaniortariaqarsimavarput tamannalu uatsinnut taamani artornaqaaq. Nalunngisaqarpunga kræftimik napparsimasunik arlalinnik illoqarfigisartik qimallugu qanigisatik ilaginagit katsorsartittunik. Taakku imaannaanngitsumik misigisaqarnerminni aappamik qitornamillu ilaginissaat pisariaqartippaat. Assammikkut tigummineqarnissaq pisariaqartippaat, Søren Alaufesen oqarpoq.

- Inuit taamatut nalaataqartut ikiortariaqarpagut. Aningaasat namminneq takkunnavianngillat arlaannik uagut nammineq iliuuseqaqqaartariaqarpugut. Ilaatigut oqallissaarineq pigaangat aatsaat pisoqalertarami, Søren Alaufesen Iterluarnaamut oqarpoq.

Maanna nuusiorfik Atlantic Music isumaqatigiissusiorfigaa cd-lu upernaap naalernerani saqqummissasoq ilimagineqarpoq.
Erinaq "Atoqqusaq"  Søren Alaufesenip ima ilaqartippaa:

"Tarneq aana aallalersoq piareersareerluni
timiminiit anillattussanngorluni
Qilak panna ornilerpaa naalliuut qimallugu
isigivarput uppererpasinnagu."