Nipilersortartunut koruunit millionit kuartii
Kalaallit nipilersortartut erinarsortartullu upernaat tamaasa aningaasanik siuarsaanermut atugassanik Grameximut qinnuteqarsinnaasarput. Aningaasat nipilersukkat radiomi, tv-mi allanilu appisimaarneqarneranneersuusarput, ukiumullu agguaanneqartartut amerleriarlutik ukioq manna 299.000 kr.-ussapput. 26-t qinnuteqarsimapput, taakkunanngalu suliniutit 18-it taperneqartut, GRAMEX nalunaarpoq.
- Qinnuteqartut ukioq manna amerlasimaqaat, aamma ukiunut siuliinut naleqqiullugu taperneqartut amerlaneroqaat. Aningaasat tapiissutaasartut saqqummersitsinernut nutaanut assigiinngeqisunullu iluaqutaalluartarput. Aamma nunani avannarlerni meeqqat erinarsoqatigiit naapeqatigiinnissaannut, pattannermut ilinniarnernut, multimedia atorlugu tusarnaartitsinermut aamma festivaleqartitsinermut tapiisoqarpoq. Tamanna takussutissaavoq aningaasat Kalaallit Nunaanneersut kalaallinut iluaqutissanngorlutik uteqqittarnerannut, Grameximi pisortaq Anette Kure Corneliussen.
Suliniutit qinnuteqaatigineqartut nalilersorneqartarput, erinarsortartut Aviaja Lumholt aamma Rasmus Lyberth nalilersuisuullutik. Taakku innersuussutaat Gramex-ip siulersuisuini eqqumiitsuliornermik sammisallit nalileqqittarpaat, kikkullu taperneqassanersut aalajangertarlugu.
Kalaallit nipilersortartut erinarsortartullu kikkulluunniit - kalaallit nipilersortarnerannik sutigulluunniit ineriartuutaasinnaasumik - tapiissuteqartarfimmit qinnuteqarsinnaapput. Tamanna takussutissaavoq erinarsortartut, nipilersortartut kattuffiillu sorliit ukioq manna taperneqarnerisa allattorsimaffianni.
Taperneqarput
- Meeqqat Erinarsoqatigiit Ikinngutaat – nunat avannarliit meerartaasa erinarsoqatigiit naapeqatigiinnissaannut ”Nordbusang”-imut Nuummi meeqqat erinarsoqatigiit peqataanissaat
- My Itchy Little Finger – festivalimut peqataanissaq (Bergen-Nuuk-Reykjavik Festival 2011, Island)
- Anna Thastum Kuitse aamma Silbat Kuitse – tusarnaartitsineq NIPI & QAAMASOQ (multimediekoncert)
- Knud Seblon aamma Erling Møldrup – Kitaani illoqarfinnut nunaqarfinnullu tusarnaartitsiartoqattaarneq
- Simon Lynge – Amerika Avannarlermi tusarnaartitsineq
- Pattattartut ”Noqartilik” – Finlandimi pattannermik ilinniartut pikkorissarnerannut peqataaneq
- Nanook sinnerlugu/Christian K. Elsner – cd-mik immiussineq
- Angajo Lennert Sandgreen – cd-mik immiussineq
- Intalik Jalál Milne – cd-mik immiussineq
- Rasmus Lyberth – cd-mik immiussineq
- Pele Møller Band – cd-mik immiussineq
- Dida Geisler Heilmann – cd-mik immiussineq
- Juaaka Lyberth – cd-mik immiussineq
- Juno Berthelsen – cd-mik immiussineq
- Ole Kristiansen – cd-mik immiussineq
- Malu Rohmann Fleicher – cd-mik immiussineq
- Inuit Feet – EP-mik immiussineq
- Small Time Giants – EP-mik immiussineq
