Nipilersortartoq kræftertoq katersuiniullugu tusarnaartitsilersut

Nipilersoqatigiit nuimasut nipilersortartoqatertik kræftertoq ikiorniarlugu sapaatit-akunnerata naanerata tulliani tusarnaartitsissapput.
Assi © : HECA NUUK A/S
Allattoq Mads Pedersen
decembarip 07-at 2016 05:41
Nutserisoq Simon Uldum -

Jorsi Sørensenip nunatsinni nipilersornerup silarsuaani immikkut ilisaritissallugu pisariaqarunanngilaq. Ukiuni qulikkuutaani arlalinni bassertartuuvoq, erinarsortartoq producererlu nuimasoq nuannaartorineqartorlu.

Nappaammilli ilungersunartumit maanna eqqugaaqqavoq. Kræftimik napparsimalersimalluni qaammatit marlussuit matuma siorna paasivaa.

Nipilersornerullu silarsuaani Jorsip ikinngutaata Jorsi qaniginerpaasaalu piffissami artornartumi ikiorusuppaat. Taamaammat ikinngutigilluagaa ukiorpassuarnilu nipilersoqatigisarsimaa Eigil Petersen katersuiniarluni tusarnaartitsinernik marlunnik aaqqissuussivoq.

Katersuiniarluni tusarnaartitsineq Nuummi Kalistiinaaqqami tallimanngornermi decembarip 16-iani arfininngornermilu decembarip 17-iani pissaaq.

Nipilersoqatigiit nuimasut minifestivalitut taaneqarsinnaasumi tusarnaartitsissapput. Ilaatigut G-60, Zikaza, Nanook aamma Qarsoq Jorsimut nulianullu Stinamut aningaasanik katersuiniarlutik tusarnaartitsissapput. Isertitat tamarmik ilaqutaasunut tunniunneqassapput, Eigil Petersen KNR-imut taama oqarpoq.

- Inuk ilungersunartumik napparsimaleraangat Danmarkimullu suliaritikkiartortariaqalerluni, taava ilaqutaasut qaninnerit asasartik tapersersorniarlugu aallaqatigissagunikku nammineerlutik akiliisariaqartarput.

- Danmarkimi nerisaqarneq najugaqarnerlu akisupput. Taamaammat nipilersortartut nuimasut ikinngutertik nuannaartorisartillu ilungersunartumik atugaqarnerani ikiorusuppaat, Eigil Petersen taama oqarpoq. 

Tusaamasarsuaq

Jorsi imminut nittarsaanniartuunngikkaluarluni bassillaqqissuunini, produceriunini minnerunngitsumillu nipiminik ilisarnartumik erinarsortakkani Nunatsinni tusaamaneqaatigai.

Nipilersortartuunermini ilaatigut tusaamasat allat ,soorlu Ole Kristiansen, Kunngi, Nuuk Posse allarpassuillu nipilersoqatigalugillu suleqatigisarpai, Nunatsinnilu nipilersukkanik nuannarisalinnut misigisaqartitsisimaqaaq, Eigil Petersen taama oqarpoq.  

- Jorsi Nunatsinni nipilersornerup tungaatigut sunniuteqartupilussuuvoq. Atia saqqummersitarpassuarni allaqqavoq. Erinarsortutut, nipilersortutut produceritulluunniit.

- Aamma kalaallit nipilersortartut saniatigut allanit ataqqisaavoq. Inussiarnersuunini imminullu nittarsaattuunnginnini, bassillaqqissuusinini nipinilu pillugit nuannarineqartupilussuuvoq ataqqissaallunilu, Eigil Petersen oqarpoq.

Katersuiniarluni tusarnaartitsinermit isertitat Jorsip Danmarkimi pisariaqartumik katsorsartinnerani Jorsimut Stinamullu oqilisaataasinnaanissaat neriuutigaa.