Nunanit allanit

Nipilersortarfik Le Bataclan ammaqqilersoq

Nipilersortarfik Parisimiittoq Le Bataclan, siorna novembarip 13-ianni peqqarniisaarnianit islamisiortunit pingasunit saassunneqarneratigut inuit 90-it toqutaaffigisaat, arfininngorpat novembarip aqqaneq aappaanni ammaqqinneqarnialerpoq.

Allattoq Karsten Sommer

novembarip 04-at 2016 14:11

Nutserisoq Erna Lynge

Nipilersortarfimmillu ammaasussaq inuk naliginnaasuunngilaq.

Tuluk rockimik nipilersortartoq Sting nipilersussaaq, ullup alianartup qaangiunneranit ukiup ataasinngorfissaa ullumik ataatsimik sioqqullugu.

Aamma atuaruk Parisimi pinerliineq

Stingip, rockertartuni The Policeni siuttuusimasup nipilersornissani uppernarsarpaa.

- Nipilersornissami suliassat marluk pingaaruteqartut suliassaraavut. Siullermik: saassussinermi siorna inuunerminnik annaasaqartut eqqaaniarlugillu ataqqiniassavagut. Aappaattut: Nipilersortarfiup oqaluttuarisaanermut pingaaruteqartup ilisarnaatai tassalu inuuneq nipilersornerlu nalliuttorsiutigissavagut, Sting oqarpoq.

Novembarip 13-ianni 14-iannilu 2015 Parisimi aaqqissuussanik arlaleriarluni saassussisoqarpoq. Le Bataclanip saniatigut arsaattarfissuup Stade de Francep eqqaani Parisillu qiterpasissortaani inunnik aamma toqutaasoqarpoq.

Katillutik inuit 130-it toqutaapput 351-illu ikiligaallutik. Frankrigip oqaluttuarisaanerani saassussinerit aattaqarnissaat.

Islamisk Stat saassussinernut pisuunerarpoq.