Nipiaa Rock Festival qulissaanik Aasianni septembarip ulluisa pingajuanniit arfininngornermut septembarip ulluisa tallimaata tungaanut ingerlanneqarnerani nersornaasiinerit pissapput.
Nipilersortartut erinarsortartullu aqqaneq-marluk piukkunneqarput.
Nipilersortartunut erinarsortartunullu nersornaasiussassat pingasuupput: guitarillaqqinnerpaaq, tumerparpaallaqqinnerpaaq taavalu erinarsortartut marluk, arnaq angullu.
- Koda Music Awards taalliortunut erinarsuusiortartunullu tunniunneqartarpoq. Uagulli INNK-miit kissaatigaarput Nipiaa Rock Festivalip ukiuni qulini ingerlanneqartarnerani takutitsilluarsimasut sunniuteqarsimasullu nersornaaserneqarnissaat, INNK-mi siulittaasoq Leif Immanuelsen Sermitsiap nittartagaani issuarneqarpoq.
Piukkunneqartunut ilaapput Peter Leibhardt, Uummannarmiuni nipilersoqatigiinni Ilaat-ikkunni guitarertartoq, ULO-li aqqutigalugu nammineq aamma saqqummersitsinikuusoq, tumerparpaartartoq Henrik Alaufesen, Inneruulakkunni tumerparpaartuuvoq, tumerparpaallammanni nuannaartorisaalluni qummut massakkut isigisaalluni. Erinarsortartuni Nina Kreutzmann Jørgensen aamma Sikazakkunni erinarsortartoq Siiva Fleischer piukkunneqartunut aamma ilaapput.